Петр Егорович Попов 70 сааһыгар

Бу дьыл ыам ыйын 20 күнүгэр саха тустууктарыттан хатыламмат чаҕылхай өйдөбүллэри хаалларбыт, “Кылбаҥнатан тустардаах уол” диэн аатынан биллибит уһулуччулаах бөҕөс Петр Попов лоп курдук 70 сааһын туолар.

Бу кэрэ-бэлиэ түгэнинэн спорду таптааччылар, тустууну сэҥээрээччилэр ааттарыттан Петр Егоровиһы ис сүрэхтэн итиитик-истиҥник эҕэрдэлиибит! Бэйэ туругун көрүнэ сылдьан уһуннук, дьоллоохтук олороругар баҕарабыт!

Кэнники сылларга кини саха тустуутун үйэтитэр сыал-сорук туруорунан, бастаан бэйэтин спорка олоҕун, оттон саха бастакы маастардарын туһунан бэртээхэй кинигэлэри бэлэмнээн таһаарда. Ити ситиһиилэриттэн кынаттанан аны үһүс кинигэтин – Россия чемпионнарын туһунан бэлиэтээһиннэрин бэчээккэ бэлэмнии сылдьар. Петр Егоровичка айар үлэтэ ситиһиилээх буоларыгар баҕарабыт!

Петр Егорович Попов толорбут анкетатыттан:

1943 сыллаахха ыам ыйын 20 күнүгэр Сунтаар оройуонун Күндэйэ сэлиэнньэтигэр төрөөбүт. Көҥүл тустуунан 1957 сыллаахха Элгээйигэ үөрэнэ сылдьан бастаан дьарыктаммыт. Бастакы тренерэ – Степан Александрович Сон, кэлин Николай Николаевич Волков салалтатынан эрчиллибит. ССРС спордун маастарын нуорматын 1961 сыллаахха Калининградка ыытыллыбыт Советскай Союз уолаттарга күрэхтэһиитигэр иккис призер буолан толорбут. Кыраныысса таһыгар 1965 с. Болгарияҕа табаарыстыы көрсүһүүгэ уонна 1967 с. Монголияҕа социалистическай дойдулар армеецтарын спартакиадаларыгар тустубута.

Бастыҥ көрдөрүүлэрэ – ССРС хамаанданан күрэхтэһиитин кыайыылааҕа (1968), эдэрдэргэ РСФСР чемпиона (1964), РСФСР чемпиона (1965), Саха сирин үс төгүллээх чемпиона.
Оҕо сылдьан сүгүрүйбүт бөҕөһүнэн – аан дойду чемпиона Владимир Рубашвилины ааттыыр. Тустуу көбүөрүгэр аан дойду чемпионнара Владимир Синявскайы, Юрий Гусовы, Юрий Шахмурадовы, Олимпиада призердара монгол Данзандарав Сэрэтэри, грузин Нодар Хохашвилины, Россия чемпионнара Нугзар Журулины, Станислав Гаджиевы кытта иэмэх мастыы эрийсибитэ.

СГУ историяҕа отделениетын (1971), тыа хаһаайыстыбатын факультетын (1982) выпускнига.
Саха АССР Министрдэрин Сэбиэтин инструкторынан, “Горнай” сопхуос парткомун секретарынан, ССКП обкомун инструкторынан, Аллайыаха оройуонун иккис секретарынан, СР ыччакка уонна спорка министринэн, “Якутскэнерго” управлениетын начальнигынан үлэлээбитэ.

СР норуотун хаһаайыстыбатын үтүөлээх үлэһитэ (2002), Сунтаар улууһун бочуоттаах гражданина (2000). Кэргэннээх, түөрт оҕолоох. Тустуу туһунан “Хардыы да чугуйбакка” (2006) уонна “Саха бастакы маастардара” (2010) кинигэлэр автордара.