Нерюнгрига —хаҥкы, Алдаҥҥа — хайыһар

07-04-04

Алдаҥҥа уонна Нерюнгрига буолан ааспыт спорт кыһыҥҥы көрүҥнэригэр спартакиадаҕа өрөспүүбүлүкэ 26 улууһуттан, Дьокуускай куораттан уонна Хотугулуу- Илиҥҥи федеральнай университеттан барыта 970 спортсмен кыттыыны ылла.

Күрэхтэһии аҕа саастаах кыттааччытынан Мэҥэ Хаҥалас улууһун хоккейга хамаандатын чилиэнэ, 59 саастаах Серафим Кычкин буолла. Оттон саамай эдэр кыттааччынан – Хаҥалас улууһуттан 10 саастаах Алина Ховрованы ааттыахха сөп. Кини шорт-треккэ күрэхтэстэ. Маны тэҥэ, СӨ ыччат дьыалатыгар уонна дьиэ кэргэн политикатыгар миниистирэ Афанасий Владимиров төрөөбүт Хаҥалаһын улууһун чиэһин көмүскээн хоккейга оонньоото. Манна даҕатан эттэххэ, шайбалаах хоккейга 11 хамаанда күөн көрүстэ. Спартакиада бырагырааматыгар аан бастаан фигурнай хаҥкылааһын киллэрилиннэ. Нерюнгритааҕы “Шахтер” спорткомплекс мууһугар барыта 35 спортсмен таҕыста. Шорт-трек диэн эмиэ спартакиада саҥа көрүҥэр 60-ча спортсмен күрэхтэстэ.
Хайыһар күрэхтэһиитигэр Европа оҕолорго олимпийскай фестивалын кыайыылааҕа Александр Клуген, Россия күрэхтэһиитин кыайыылааҕа Владимир Рыбкин, оттон биатлоҥҥа Сибиир уонна Уһук Илин күрэхтэһиитигэр бастакы миэстэлээх Николай Чуфистов курдук күүстээх спортсменнар кытыннылар.
Алдаҥҥа, спорт кыһыҥҥы көрүҥнэригэр өрөспүүбүлүкэ 3-с спартакиадатын үөрүүлээхтик түмүктээһин буолла. Түөрт күннээх күрэхтэһии түмүгүнэн спорт уон көрүҥүн хамаанданан кыайыылаахтара уонна призердара – кубоктарынан, сыаналаах бириистэринэн наҕараадаланнылар.
Ол курдук, бастакы бөлөххө 13 очукуолаах Нерюнгри хамаандата бастаата. Кинилэр, эрдэттэн сэрэйиллибитин курдук, хайа хайыһарын спордугар, сноубордка уонна биатлоҥҥа тэҥнээхтэрин булбатылар. Ону тэҥэ нерюнгрилар кыһыҥҥы многоборьеҕа ситиһиилээхтик кытыннылар. Ааспыт спартакиада кыайыылааҕа – Дьокуускай куорат хамаандата 17 очукуолаах иккис миэстэни ылла. Өрөспүүбүлүкэбит киин куоратын спортсменнара шайбалаах хоккейга, хайыһарынан спортивнай ориентированиеҕа уонна фигурнай хаҥкылааһыҥҥа кыайыы үөрүүтүн биллилэр. Үһүс бириистээх миэстэҕэ 21 очукуолаах Алдан оройуонун хамаандата таҕыста. Алданнар хайыһарга, биатлоҥҥа, хайа хайыһарыгар уонна кыһыҥҥы многоборьеҕа ситиһиилээхтик кытыннылар.
Иккис бөлөххө шорт-трек, хайыһарынан спортивнай ориентирование, биатлон уонна фигурнай хаҥкылааһын көрүҥнэригэр куһаҕана суохтук кыттыбыт Амма хамаандата бастакы миэстэни ылла. Бу бөлөххө иккис-үһүс миэстэлэргэ Нам уонна Мэҥэ Хаҥалас улуустарын хамаандалара таҕыстылар.
Үһүс бөлөххө Томпо бастакы, Өймөкөөн иккис, Булуҥ үһүс миэстэлэргэ таҕыстылар. Оттон төрдүс бөлөххө Муома хамаандата бастаата, Үөһээ Халыма иккистээтэ, Эдьигээн үһүстээтэ.
Хомойуох иһин кыһыҥҥы спартакиадаҕа Сунтаар, Кэбээйи, Усуйаана, Аллараа Халыма, Эбээн Бытантай улуустара уонна Жатай бөһүөлэгэ кыттыбатылар.
Буолан ааспыт күрэхтэһии дьоруойдарынан хайыһардьыттар Ярослав Котлярчугу, Анастасия Щербаны, Александр Клугены, Анастасия Дубованы, хайа хайыһарын спордугар чөмпүйүөннэри Сергей Коренченконы уонна Анастасия Захарованы, шорт-трек күрэхтэһиитин кыайыылааҕа Тарас Сибирькову уо.д.а. ааттыахха сөп. Маны тэҥэ төһө да уопуттара суоҕун иһин, улуустарын чиэһин көмүскээбит тыа сирин хоккеистарын, фигуристарын, шорт-трекистарын бэлиэтиир оруннаах.
Хамаандалар аны түөрт сылынан эмиэ Саха сирин соҕуруу оройуонугар мустан, спорт кыһыҥҥы көрүҥнэрин төрдүс оонньууларын мэтээлин иһин күрэс былдьаһыахтара.

Бэчээккэ бэлэмнээтэ
Петр ПАВЛОВ.