Бу өрөбүллэргэ икки күрэхтэһиини көрүөхпүт

21-04-04

Тустууну таптааччылар бу өрөбүл күннэргэ сэргэхсийиэхпит, икки күрэхтэһиини кэтээн көрүөхпүт. Бастакыта – Монголияҕа, Олим­пиадаҕа кыттар быраабы ылар иһин бастакы аан дойдутааҕы сүүмэрдиир түһүлгэ, иккиһэ – Красноярскайга эдэрдэр Россияҕа биирдиилээн бастыыр иһин күрэхтэһиилэрэ.

Ааспыт нэдиэлэҕэ Сербияҕа, Европа дойдуларын Олимпиадаҕа сүүмэрдиир күрэхтэһиилэрэ ыытыллан түмүктэннэ. Онно Саха сирин тустууну таптааччылара Белоруссияттан кыттар уолаттарбыт утарсааччылара Асадулла Лачинов (57 кг) уонна Азамат Нуриков (65 кг) кыттыыларын кэтээн көрдүлэр. Онуоха Лачинов Азербайджантан Махмуд Магомедовка 6:8 ахсаанынан хотторон, күрэхтэһииттэн тута туораабыта. Оттон Нуриков словенец Д.Хабаты (4:4) хаачыстыбанан хотон баран, салгыы күрэхтэһиигэ украинец Андрей Квятковскайга 4:6 ахсаанынан хотторбута. Онон Белоруссия тренердэрин быһаарыыларынан, салгыы күрэхтэһиигэ биһиги уолаттарбытыгар Владислав Андреевка уонна Александр Контоевка Монголияҕа тусталларыгар кыах бэрилиннэ.
Кинилэри тэҥэ Улан-Батор көбүөрүгэр саха тустууга оскуолатын иитиллээччилэриттэн Кыргызстан чиэһин көмүскүүр Иннокентий Иннокентьев (74 кг) уонна Айаал Лазарев (125 кг) итиэннэ Таджикистан аатыттан аан бастаан кыттар Тимур Пестерев (65 кг) тахсыахтара.
Балаһыанньа быһыытынан, ыйааһын ахсын үс бастакы миэстэни ылбыттар – бэйэлэрин хамаандаларыгар Олимпиадаҕа барар быраабы аҕалыахтара. Маныаха, спорду сэҥээрээччилэр үһүс миэстэни былдьаһыы хайдах быһыылаахтык буоларын интэриэһиргээн ыйыталлар. Билэргит курдук, билиҥҥи быраабыланан тустуу күрэхтэһиилэригэр ыйааһын аайы иккилии үһүс миэстэ оонньонор. Оттон Монголиятааҕы, Олимпиадаҕа сүүмэрдиир түһүлгэҕэ ол үһүс миэстэлээхтэр бэйэ-бэйэлэрин кытта утарыта көрсөн, эбии хапсыһыыны ыытан олимпийскай путевка иһин тустуохтара.
Бу күннэргэ “Триумф” спорка бэлэмнэнии киинигэр Саха сирин көҥүл тустууга сүүмэрдэммит хамаандатын Россия чөмпүйэнээтигэр бэлэмнэнэр биир түһүмэҕэ түмүктэннэ. Эрчиллэр-үөрэтэр түмсүүгэ Молдова, Румыния уонна Болгария тустууктара кыттыыны ыллылар. Түмсүү түмүктэниитэ бэйэлэрин бэлэмнэрин тургутан көрөр инниттэн, бөҕөстөр биэстии хонтуруоллуур хапсыһыылары ыыттылар.
Ордук болҕомто аан дойду икки, Россия биэс төгүллээх чөмпүйүөнэ Виктор Лебедевкэ уурулунна. Хонтуруоллуур хапсыһыылар кэннилэриттэн сыаналаатахха, Виктор үчүгэй турукка сылдьара көстөр. Билиҥҥи кэмҥэ тумус туттар бөҕөспүт утуу-субуу Европа чөмпүйэнээтин боруонса призера Иван Гуйдяны (Румыния) 5:0, норуоттар икки ардыларынааҕы турнирдар призердара Марин Филиппы (Румыния) 12:0, Европа дойдуларын оонньууларын боруонса мэтээлин хаһаайына Александр Чиртоаканы (Молдова) 14:0, Россия чөмпүйэнээтин боруонса призердара Виктор Рассадины 5:1 уонна Арыйан Тютрины 6:2 ахсааннарынан итэҕэтиилээхтик кыайталаата. Онон тренердэр Виктор Лебедев Россия чөмпүйэнээтигэр бэлэмнэниититтэн астыннылар. Кинини ыам ыйын 25-30 күннэригэр буолар Олимпиадаҕа сүүмэрдиир дойду улахан эппиэттээх күрэхтэһиитигэр ситиһиилээхтик тустар туругар киириэҕэ, барыта былаан быһыытынан баран иһэр диэн буолла.
Аны туран, эмиэ бу өрөбүл күннэргэ Красноярскайга 20-гэр диэри саастаахтар Россияҕа бастыыр иһин күрэхтэһиилэрэ болҕомтону тардар. Онно Саха сириттэн сүүрбэччэ эдэр бөҕөс кыттар. Балаһыанньа быһыытынан бастаабыттар – аан дойду, иккистээбиттэр – Европа күрэхтэһиитигэр кыттар быраабы ылыахтара.

Петр ПАВЛОВ.