Монголияҕа күппүлүү бардыбыт

28-04-04

Дьэ, ааспыт өрөбүл күн тустууну таптааччылар Монголияҕа ыытыллыбыт Олимпиадаҕа сүүмэрдиир аан дойдутааҕы бастакы турнирга биир дойдулаахтарбыт тустууларын сирийэн көрдүбүт. Итиэннэ биир даҕаны уолбут бириистээх миэстэҕэ киирбэтэҕиттэн хомойо санаатыбыт.

Владислав Андреевпыт (57 кг) узбек Н.Сафаровы 6:2, Испанияттан Л.Метревелины 2:1 ахсаанынан кыайан баран, Иван Гуйдяҕа (Румыния) 2:4 хотторон кэбистэ. Оттон бөлөҕөр үһүс миэстэни ким ыларын быһаарсыыга Европа чөмпүйэнээтин үрүҥ көмүс призера А.Яценкоҕа (Украина) 2:10 ахсаанынан сабырыйтарда. Манна даҕатан эттэххэ, индус С.Томар уопсай үһүс миэстэни ким ыларын быһаарсыыга Яценконы 11:0 ахсаанынан хотон, олимпийскай путевканы тутан хаалла. Оттон финалга И.Гуйдя азербайджанец М.Гасанзадены 8:3 кыайан бастаата.
В.Андреев эчэйиилээх буолан сыл аҥарыттан ордук кэмҥэ көбүөргэ тахсан тустубатаҕа таайан, онно эбиитин тус тренерин хомолтолоохтук сүтэрэн дьарыгын былаанын ситэ толорбокко, урукку чөлүгэр киирбэккэ сылдьара көһүннэ.
Таджикистан аатыттан аан бастаан тустубут Тимур Пестерев (65 кг) кореец Ли Сенг Чулга баалынан ыраастык хоттордо. Мин санаабар, Тимур тустубатаҕа ыраатан, эрчиллиигэ уонна күрэхтэһиигэ куоттарыыта элбэх буолан, урукку таһымыттан быдан ыраах кэрдиискэ сылдьар.
Уопуттаах бөҕөс, 34 саастаах Александр Контоев (65 кг) туох баарынан киирсэ сатаата. Бастаан сенегалец Д.Диаттаны 7:2 ахсаанынан хотто, салгыы Францияттан кыттар украинец Ю.Семакинныын тустуутугар бөҕөстөр иккиэн биирдии сэрэ­тиилэннилэр, биир түгэҥҥэ көбүөр таһыгар анньан таһаарбытынан, 2:1 ахсаанынан Семакин кыайда. Ханныгын да иһин, Александр бачча сааһыгар диэри улахан таһымнаах күрэхтэһиигэ туста сылдьарын сөҕүөх эрэ тустаахпыт. Киһибит уруккута буолбатах, этэргэ дылы “киһи кэмнээх, балык ыамнаах”.
Оттон Иннокентий Иннокентьев (74 кг) армян Г.Григоряҥҥа 3:4 ахсаанынан хоттордо. Син киирсиэх киһи мүччү-хаччы туттаран, биир баалынан баһыйтарда. Ол эрээри, уһун унньуктаах тустууга биир тэҥник, сэниэлээхтик тустарыгар саарбахтаатым. Финалга тахсыбыттар биэстиитэ туһуннулар. Оччотугар, Иннокентий кыаҕын барытын ыйааһынын түһэриитигэр сүтэрэр дуу диэхпин баҕарабын.
Саамай эрэммит киһибит Айаал Лазарев (125 кг) Словакияттан осетин Сослан Гаглоевы уонна венесуэлец Л.Вивенеһы ыраастык, Э.Лопеһы (Пуэрто-Рико) 13:2 ахсаанынан кыайталаан баран, финалга тахсыыга венгр Д.Лигетигэ көбүөр таһыгар хапсыһыыга атаҕынан олуйан түөрт баалга бырахтарыыта улахан содуллаах буолла. Ол да буоллар, бөлөххө үһүс миэстэни ким ыларын быһаарсыыга кыахтар бааллара. Болгар Л.Илиевы кыайыан сөптөөх этэ. Ол эрээри, бэрт кылгас бириэмэҕэ түөрт тустууну ыытан, күүһэ-сэниэтэ эстэн, биһигини үөрдүбэтэ, 1:3 ахсаанынан хоттордо.
Дьэ онон, биир эмэ уолбут эрэлбитин толоруо диэн бүк эрэммит дьон хомойуута, хомолтото ханна барыай!? Ханныгын да иһин, Монголия көбүөрэ саха тустуутун туох, ханнык таһымҥа турарын көрдөрдө. Итэҕэстэрбитин арыйда. Ол эрээри, быстах түмүктээһиннэри, ситэтэ суох сыаналааһыннары оҥорорго тиэтэйимиэҕиҥ, түгэҕин көрүөҕүҥ. Аны ыам ыйын 6-8 күннэригэр Турцияҕа, Олимпиадаҕа сүүмэрдиир аан дойдутааҕы иккис түһүлгэ хаалла. Онно ыйааһын ахсын иккилии путевка оонньонор…

Петр ПАВЛОВ.