Олимпиада көбүөрүгэр саха бөҕөһө тахсыа дуо?

12-05-04

Туох диэхпин билбэппин. Турцияҕа ыытыллыбыт Олимпиадаҕа сүүмэрдиир бүтэһик күрэхтэһиигэ тустууктарбыт биһиги баҕабытын кыайан толорботулар. Тустуу бэриниилээх ыалдьааччылара хомолтоҕо куустара сылдьаллар. Ама, биир да уолбут аны сайын Бразилияҕа буолар Олимпийскай оонньууларга кыттыа суоҕа дуо? Хайдах эрэ итэҕэйиллибэт.

Билигин даҕаны барыта быһаарылла илик гынан баран, түөрт сыллаах олимпийскай болдьоххо тустууларын ырытан көрдөххө, Владислав Андреев аан дойду уонна Европа чөмпүйэнээттэрин призера буолан, Иннокентий Иннокентьев Азия чөмпүйэнээтигэр иккитэ миэстэлэһэн, Айаал Лазарев Азия кыайыылааҕын аатын ылан, күүстээхтэр ахсааннарыгар сылдьыбыттара эбээт. Кинилэр Олимпиадаҕа кыттар кыахтаах этилэр. Ол эрээри, баат биэрбэтэ, түһүлгэ тосхойбото эрэ диирбитигэр тиийэбит.
Аны эрэлбит соҕотох Виктор Лебедевкэ эрэ. Ону билэрбит олох кыра бириэмэ хаалла, Россия көҥүл тустууга чөмпүйэнээтин бырагырааматын быһыытынан, ыам ыйын 27 күнэ – саха тустуутугар быһаарыылаах күнүнэн буолуоҕа. Ити күн 57 кг ыйааһын чөмпүйүөнэ быһаарыллыаҕа.
Ханныгын да иһин, Владислав Андреев (57 кг) улахан эчэйии кэнниттэн урукку тустар таһымыгар киирбэккэ сылдьарын билиниэх тустаахпыт. Стамбулга кини Седолли Кастриот диэн Косово бөҕөһүн очукуонан ыраастык кыайан баран, Азия былырыыҥҥы чөмпүйэнээтин призера Надырбек Самат Уулуга (Кыргызстан) 2:7 ахсаанынан хотторон кэбистэ. Манна санатан эттэххэ, Турциятааҕы турнирга олимпийскай лицензия ыйааһын аайы иккилии эрэ киһиэхэ бэрилиннэ, ол аата, финалистарга. Ол иһин, биирдэ хоттордуҥ да – путевка иһин киирсэр кыаххын сүтэрэҕин.
Иккис бөҕөспүт Иннокентий Иннокентьев бу сырыыга хамаанда интэриэһигэр бэйэтин күүһүн 86 киилэҕэ холосто. Итиэннэ бастакы эргииргэ аан дойду икки төгүллээх чөмпүйүөнэ Ибрагим Алдатовка (Украина) 2:3 ахсаанынан хотторон кэбистэ.
Дьиҥэ, бу күрэхтэһиигэ Айаал Лазарев (125 кг) кыттарын кэтэспиппит эрээри, Кыргызстан тренердэрэ бу сырыыга кини ыйааһыныгар Алексей Крупнякову туһуннардылар. Киһилэрэ венесуэлец Вивенеһи 11:4, молдован Романовы 2:1 ахсааннарынан кыайан баран, финалга тахсыыга Ибрагим Саидовка (Белоруссия) 6:10 хотторон баран, үһүс бириистээх миэстэ иһин киирсиигэ аны румын Рареска ыраастык уурдаран, бэһис миэстэҕэ үтүрүлүннэ.
Бу ыйааһыҥҥа интэриэһинэй түгэн үөскээтэ, Зреняниҥҥа ыытыллыбыт Европа континенын Олимпиадаҕа сүүмэрдиир күрэхтэһиитигэр бастаабыт уонна иккистээбит А.Засеев (Украина) уонна Ю.Джалилов (Белоруссия) бобуулаах препараты туттубуттара биллэн, иккиэн Олимпиадаттан туоратылыннылар. Кинилэр оннуларыгар тустубут Хоцяновскай уонна Саидов төһө да лицензия ылбыттарын үрдүнэн, 125 киилэҕэ икки путевка хаһаайына биллибэккэ турар.
Итинэн тугу этээри гынабыный? Биһиги тустаах салайааччыларбыт бэйэбит спортсменнарбыт тустарыгар ситэ турууласпаттара, туруорсубаттара хомолтолоох. Ханныгын да иһин, Казахстаҥҥа ыытыллыбыт түһүлгэҕэ Айаал Лазарев – Даулет Шабанбайы ыраастык уурбутун аахсыбатахтара кыһыылаах. Айаал быйылгы күрэхтэһиилэргэ төһө даҕаны финалга тахсыбатар, көрдөрүүлэрэ эриэ-дэхси дии саныыбын. Балаһыанньа быһыытынан, Олимпиадаҕа ыйааһын ахсын 19-туу киһи кыттар эбит буоллаҕына, ыарахан ыйааһыҥҥа билигин 17 киһи путевкалаах. Икки путевка аһаҕас. Ону хайдах быһаараллара биллибэт. Хаалбыт кэмҥэ баҕар ханнык эмэ турнирга ити икки путевканы оонньотуохтарын сөп. Онон биһиги бөҕөспүт ханнык даҕаны түгэҥҥэ бэлэм сылдьыан сөп курдук көрөбүн.

Петр ПАВЛОВ.