Чөмпүйэнээт оһуохайынан түмүктэннэ

28-07-01

Европа мас-рестлиҥҥэ чөмпүйэнээтэ уон дойду мадьыныларын түмтэ. Түһүлгэҕэ Россия, Грузия, Украина, Польша, Азербайджан, Литва, Финляндия, Германия, Армения, Чехия спортсменнара таҕыстылар.

Бастакы күн дьахталларга 55 кг ыйааһыҥҥа Ыксаллаах быһыы-майгы министиэристибэтин сотруднига Сардаана Осипова түөрт утарсааччытын кыайталаан, Европа чөмпүйүөнүнэн буолла. Маладьыас! Дэгиттэр кыахтаах спортсменка соторутааҕыта диэри чэпчэки атлет быһыытынан биллэр этэ. Аны Сардаана мас тардыһарын ааһан, өссө бодибилдинг уонна кроссфит күрэхтэһиилэригэр ситиһиилээхтик кыттар. Кэлин биллибитинэн өссө, үлэтин хайысхатын быһыытынан кини баһаарынай-прикладной многоборьеҕа күрэхтэһэр эбит. Дьэ, дэгиттэр кыахтаах спортсменка диэтэҕиҥ!
75 киилэҕэ Яна Захарова бастакы киирсиитигэр аан дойду чөмпүйэнээтин призера М.Таларчигы (Польша) кытта тардыһыытыгар атаҕын эчэтэн, 1:2 ахсаанынан хотторон кэбистэ. Ол да буоллар, харса суоҕун киллэрэн салгыы күрэхтэһиигэ Грузия спортсменкатын кыайан баран, чөмпүйүөннээбит О.Сукачка (Украина) хотторон, боруонса мэтээл хаһаайынынан буолла.
Эр дьоҥҥо 125 кг ыйааһыҥҥа номоххо киирбит Анатолий Баишев утарсааччыларыгар гроссмейстердыы уруок биэрдэ. Утуу-субуу армрестлиҥҥэ аан дойду биэс төгүллээх чөмпүйүөнэ Д.Кометианины (Грузия), кини биир дойдулааҕа Ч.Чигладзены, бэйэтин киһитэ М.Гоголевы уонна быһаарыылаах тардыһыыга армянин Д.Егиазаряны кыайталаата. Итинэн уопуттаах, кыайыыга дьулуурдаах маастар билигин да кыахтааҕын көрдөрдө.
90 киилэҕэ тоҕус мадьыны күөн көрүстэ. Кинилэртэн күүстээхтэринэн Егор Баишев уонна Москва спортсмена Евгений Пиконин буолаллара эрдэттэн биллэрэ. Ким кими кыайарын түһүлгэ эрэ быһаарда. Онуоха Егор оруобуна аҕатыгар майгынныырдыы тардыһыыны, хамсаныыны көрдөрөн, дьоһун кыайыыны ситистэ. Онон аҕалаах уол Анатолий уонна Егор Баишевтар – Европа мас-рестлиҥҥэ чөмпүйүөннэринэн буоллулар. Кырдьык да, киһи сөҕөр ситиһиитэ.
Манна сыһыары тутан эттэххэ, чөмпүйүөннэр сиэдэрэй оҥоһуулаах мэтээллэринэн, кубоктарынан уонна эбиитин 500-түү долларынан наҕараадаланнылар. Иккистээбиттэр – 300-түү, үһүстээбиттэр – 200-түү долларынан бэлиэтэннилэр. Хамаанданан түмүккэ Россия ырааҕынан быраҕан эрэллээхтик бастаата. Ол курдук, 10 кыһыл көмүс, 6 үрүҥ көмүс уонна 5 боруонса мэтээли ылары ситистэ. Иккис миэстэҕэ элбэх кыттааччылаах Грузия хамаандата таҕыста. Оттон үһүс бириистээх миэстэни Украина мадьынылара ыллылар. Чөмпүйэнээт оһуохайынан түмүктэннэ.

Владислав КОРОТОВ.

Батуми.