Көстүүнэйдээх Алла

Дьяконова Алла

Кочнев уулуссатын түгэҕэр турар тупсаҕай көрүҥнээх уһаайбаҕа Сангаар ыалдьыттара таптаан түһэллэр. Дьяконовтар тэлгэһэлэригэр сүүрбэ миэстэлээх мас көстүүнэй (гостиница), улахан гараас, сауна, оҕуруот баар. Ыал ийэтэ, Дьокуускай куораттан төрүттээх, Алла маннык кэпсиир:

— Кэргэним Гостехнадзорга иниспиэктэринэн үлэлиир этэ. Билигин пилораманан дьарыгырыан баҕарар. Иккиэн судаарыстыбаннай сулууспаттан дьоҕус урбааҥҥа көстүбүт. Кини тиэхиньикэни регистрациялыыра, бэрэбиэркэлиирэ, оттон мин саахсаҕа дьону регистрациялыырым. Уонча сыл үлэлээн баран, чааһынай дьыала арыйбыппыт. Көстүүнэйбитин “Северная” диэн ааттаабыппыт – Кочнев уулуссатын эргэ аата. Ол иннинэ Сангаарга икки эрэ көстүүнэй баара. Саахсаҕа үлэлии сырыттахпына салайааччыбыт кэлбитигэр ханна түһэрэбитий диэн толкуйга түспүппүт. Арыый даҕаны үчүгэй усулуобуйаҕа – даачаҕа түһэрбиппит. Кырдьык, дьону түһэрэр тупсаҕай сирбит суох эбит диэн, идея онно киирбитэ. Эдэр дьиэ кэргэн быһыытынан 2009 сыллаахха көмө үп ылбыппыт. Үс хостоох дьиэлэммиппит. Саҥа дьыл сынньалаҥнарыгар миэбэл ылан оҥостубуппут, аҕыс миэстэҕэ дьону түһэрэр этибит. Онно үлэм быыһыгар бэйэм сууйааччынан, дьону көрсөөччүнэн сылдьыбытым. Эдэрим бэрт да буолан, барытын бэйэм кыанарым. Ол кэмҥэ бу учаастак турар да турар. Ким даҕаны ылбат. Тэлгэһэ аҥаарын ылан турар гараас баара. Ону кэргэним бэйэтэ көтүрэн, оҥостон олоробут. Манна сыбаалка, барыта тимир этэ. Билигин даҕаны ситэри дьаһаллыахтаах.
— Бэйэҥ туох идэлээххиний?
— Уйулҕа үөрэхтээхпин, идэбинэн аҕыйах сыл үлэлээбитим. Манна, кэргэним дойдутугар, олохсуйбуппут ыраатта.
— Дьокуускай кыыһа киин сиртэн тэйиччи олохсуйбут эбиккин.
— Сангаары сөбүлүүбүт. Тыа сиригэр маннык тэринэн, быр-бааччы олоруохпун оҕо эрдэхпиттэн баҕарар этим. Урбаанньыт хаана уруккуттан баар, быһыыта. Дьоҥҥо өҥөнү оҥорор буоллахха, үчүгэй усулуобуйа тэрийиэхтээхпит дии саныыбын. Ол иһин барытын үчүгэй, тупсаҕай оҥоро сатыыбын.
Кырдьык, Алла тэлгэһэтиттэн саҕалаан дьиэтигэр-уотугар тиийэ – бүтүннүү уурбут-туппут курдук тупсаҕай, табыгастаах. Билигин көстүүнэйэ сүүрбэ миэстэлээх, туспа куукуналаах, сынньанар, бильярдыыр саалалаах, остолобуойдаах. Тымныы, итии уу, сауна – барыта баар.
— Көстүүнэйтэн ураты өссө тугунан дьарыктанаҕын?
— Сушинан дьарыктана сатаабытым. Улаханнык сакаастаабаттар этэ. Остолобуойу саас үлэлэтэбин. Сакааһынан аҕыйах киһилээх чөкө бырааһынньыктары тэрийэргэ табыгастаах. Прачечнай өҥөтүн оҥоруунан дьарыктанабыт. Маннааҕы оҕо саадтарын таҥастарын сууйабыт, өтүүктүүбүт, илдьэн биэрэбит. Бэйэҥ дьарыктаах буоллаххына, түүннэри-күнүстэри үлэлиэххэ наада эбит. Кэргэним өйүүр буолан, күүстээхпит.
Тыа сиригэр олорон бэйэ дьыалатынан дьарыктанар дьону убаастыыбын. Кинилэри кытта сэһэргэстэххэ, оройуоҥҥа олорор бары өттүнэн табыгастаах буолуохтаах – диэн санаа саҕыллар. Куораттан итэҕэһэ суох көстүүнэйдээх Дьяконовтартан сүргэбит көтөҕүллэн таҕыстыбыт.

Надежда САМСОНОВА.