Виктор өссө даҕаны тустуоҕа

697472

Тренер Владимир Модосян бэйэтин иитиллээччитин инники былаанын, Виктор тустуутун тохтотор санаата суоҕун туһунан суруналыыстарга иһитиннэрдэ.

“Олимпийскай оонньууга төһө да табыллан тустубатаҕын иһин, Виктор Лебедев спорка олоҕун түмүктүүр санаата суох, кини өссө даҕаны тустуоҕа. Ол эрээри, урукку ыйааһыныгар буолбакка, үрдүкү ыйааһыҥҥа кыттыаҕа. Билигин кини үчүгэйдик сынньаныан наада. Хотторууттан улахан санаа түһүүтүн аһарыммытын кэнниттэн хаһан, ханнык күрэхтэһиигэ кыттарбытын быһаарсыахпыт”, — диир, Владимир Модосян.
Кырдьык, Олимпиада иннинэ сууттаһан хайаан, сотору-сотору допинг хонтуруолу ааһан, ыйааһынын ыараханнык түһэрэн уонна ыалдьааччылар эрэллэрин толорбокко уолбут санаа муунтуйуутугар киирбитэ. Ылан көрдөххө, хайдах эрэ бары биир кэмҥэ кинини утары буолбуттара. Арбитражнай суукка сайабылыанньа түһэрэн кыайбытын иэстэһэн, Допины утары үлэлэһэр агентство (ВАДА) үлэһиттэрэ бүтэһиккэ диэри анаан кинини эрэ сойуолаһа сатаатылар. Итинэн тустарга сорунуутун ыһан кэбистилэр. Маннык баттааһыны атын киһи эбитэ буоллар, тулуйуо суоҕа этэ, сапсыйан кэбиһиэ этэ. Оттон биһиги Викторбыт кытаанах, эр киһилии санааны ылынан, сынтарыйбат характерын көрдөрөн, уонча киилэни түһэринэн баран, бастакы киирсиитигэр Азия быйылгы чөмпүйүөнэ индус Сандип Томары хоппута. Иккис эргииргэ эмиэ кыайарыгар эрэммиппит, ол гынан баран, киһи кыаҕа эмиэ кэмнээх-кэрдиилээх эбээт…
Владимир Модосян этэринэн, өскөтүн барыта этэҥҥэ буоллаҕына, Виктор Олимпиада кэнниттэн бастакы күрэхтэһиитинэн эһиил тохсунньу ыйга Красноярскайга, Иван Ярыгин аатынан норуоттар икки ардыларынааҕы Гран-при турнир буолуоҕа.

Петр ПАВЛОВ.