Көс омуктар оонньууларын кыайыылааҕа

дима

Кыргызстан Чолпон-Ата куоратыгар мас-рестлиҥҥэ аан дойду иккис чөмпүйэнээтин кэнниттэн тута Көс омуктар аан дойдутааҕы оонньуулара буолан ааста. Манна мас тардыһыытыгар аан дойду чөмпүйүөнэ Дмитрий Попов бу көрүҥҥэ иккиһин аан дойду чөмпүйүөнэ ааты сүктэ.

Көс омуктар аан дойду­тааҕы оонньуулара быйыл иккис төгүлүн буолла. Жайлоо-Кырчын диэн Чолпон-Ата куорат таһыгар баар сиргэ ыытылынна. Манна Грузия, Бразилия, Монголия уонна Саха сирин ыарахан ыйааһыннаах атлеттара күөн көрүстүлэр.
«Оонньуу быраабылатынан утарсааччыларбын барыларын кытта күрэхтэстим. Утарсааччыларбын 2:0 ахсааҥҥа кыайан, финалга Нам мадьыныта Евгений Иванову кытта кииристим. Бастакы түһүмэххэ кыайбытым кэнниттэн, Евгений күрэхтэһии кэмигэр атаҕын эчэтэн салгыы киирстибэтэҕэ. Күрэхтэһии муҥутуур кыайыылааҕа буолбуппуттан олус үөрдүм. Виктор Колибабчугу, Мартинс Лициси кытта мас тардыһан көрөр санаалаах этим, хомойуох иһин, күрэхтэһиигэ кыттыбатылар. Кэлэр сылга аан дойду чөмпүйэнээтигэр кыттар баҕа санаалаахпын», — диэн Дмитрий санаатын үллэстэр.
Быйыл алтынньы ыйга Екатеринбург куоракка мас тардыһыыга Россия муҥутуур кыайыылааҕын быһаарар чөмпүйэнээт ыытыллаары турар. Манна дойдубут күүстээх мадьынылара бары киирсиэхтэрэ, олор ортолоругар Дмитрий Попов күүһүн холонон көрүө.

Айтана АММОСОВА.