Мадьыныларбыт аан дойдуга аатырдылар

докалов

Балаҕан ыйын 3-4 күннэригэр Кыргызстан Чолпон-Ата куоратыгар мас-рестлиҥҥэ аан дойду иккис чөмпүйэнээтэ буолла. Манна 33 араас дойдуттан 191 ааттаах-суоллаах мадьынылар илин-кэлин түһүстүлэр.

Чөмпүйэнээккэ саха мадьынылара тоҕус кыһыл көмүс, биир үрүҥ көмүс уонна биир боруонса мэтээллэри ыллылар.
«Саха спордун төрүт көрүҥэр аан дойду чөмпүйэнээтэ ыытыллара үөрдэр. Мас тардыһыыта сайдарыгар, улахан таһымҥа тахсарыгар өссө биир хардыы оҥоһулунна. Бу чөмпүйэнээти уонна Көс омуктар оонньууларын үгүс киһи интэриэһиргээн кэтээн көрдө», – диир мас-рестлинг норуоттар икки ардыларынааҕы федерациятын генеральнай сэкирэтээрэ Иннокентий Григорьев.
Чөмпүйэнээккэ эр дьоҥҥо Игорь Дьяконов (60 киилэҕэ диэри ыйааһыннаахтарга), Афанасий Платонов (70 киилэҕэ диэри), Анатолий Гладков (80 киилэҕэ диэри), Павел Черноградскай (90 киилэҕэ диэри), Виктор Докалов (105 киилэҕэ диэри) уонна Анатолий Баишев (125 киилэҕэ диэри) иннилэрин хайа да омук мадьыныларыгар биэрбэккэ, аан дойду чөмпүйүөнүн аатын ыллылар. Дьахталларга Марина Федоренко, Туяра Орлова уонна Татьяна Григорь – кыһыл көмүс мэтээл, Анна Охлопкова – үрүҥ көмүс мэтээл, Саина Седалищева боруонса мэтээл хаһаайыттарынан буоллулар.
2014 сыллаахха аан дойду чөмпүйүөнүн аатын ылбыт 90 киилэҕэ диэри киирсэр Павел Черноградскай тыҥааһыннаах киирсиини көрдөрдө. Кини утарсааччыта Америка мадьыныта Паул Шон Коуч күүстээх бэлэмнээх буолан, уолбутун кыһыл көмүс мэтээлтэн кыранан «матара» сыһан, ыксаллаах быһыыны-майгыны үөскэтэ сырытта. «Финалы олус ыарырҕаттым. Атын дойдулар спортсменнара мас тардыһаллара күүһүрэн, кыаҕыран иһэр», – диэн Павел кэпсиир.
Оттон 125 киилэҕэ диэри ыйааһыҥҥа аан дойду аатырбыт мадьыныта, аан дойду хас даҕаны төгүллээх чөмпүйүөнэ нуучча бухатыыра Виктор Колибабчук грузин Зваид Каджайга хотторон, иккис буолла. Кини квалификационнай рауҥҥа Америкаттан сылдьар күүстээх утарсааччытын Мартинс Лициси 2:1 ахсааҥҥа кыайбыта. Бу кэнниттэн финалга тахсан, аны, хотторон хаалан үгүс дьону соһутта да, хомотто да.
Дьахталларга 55 киилэҕэ уонна 85 киилэҕэ диэри ыйааһыннаахтарга саха кыргыттара кыһыл көмүс мэтээллэри кыайан ылбатылар. 85 киилэҕэ диэри ыйааһыннаахтарга күрэхтэһэр Саина Седалищева боруонса мэтээлгэ тигистэ. Оттон 55 киилэҕэ диэри ыйааһыннаахтарга Анна Охлопкова финалга грузинка Валита Горелчанкалыын күрэхтэһэн, иккис буолары ситистэ.
Иннэ гынан, мас-рестлиҥҥэ аан дойду чөмпүйэнээтигэр, уопсай түмүк көрдөрөрүнэн, саха мадьыныларын көмөтүнэн Россия сүүмэрдэммит хамаандата бастакы миэстэни ылары ситистэ.

Айтана АММОСОВА.