Сунтаардар хайанан сүүрэллэр

image-14-09-16-04-10

Сунтаар улууһун Кэмпэндээйи нэһилиэгэр үгэскэ кубулуйбут хайанан сүүрүүгэ күрэхтэһии буолан ааста. Быйылгы сүүрүү Сунтаар улууһун аатырбыт сүүрүгэ Алексей Яковлев – Сүүрүк Дьаакыбылап төрөөбүтэ 100 сылыгар ананан ыытылынна.

«Сүүр, тыын, кыай!», — диэн бэргэн этиини тутуһан, хайанан сүүрүү Кэмпэндээйигэ быйыл 14-с сылын тэриллэр. Улуустааҕы сүүрүү күрэҕэр алта нэһилиэктэн уопсайа 61 оҕо 1000, 2000, 3000 миэтэрэ уһуҥҥа илин-кэлин түһүстүлэр.
«Манна ким уһун тыыннааҕа, тулуурдааҕа, кыайыыга дьлуурдааҕа, бэлэмнээҕэ көстөр, быһаарыллар. Улаатан эрэр оҕо этин-хаанын эрчийиигэ, бэйэтин холонон көрүүтүгэр олус туһалаах күрэхтэһии», – диэн сүүрүү тренера Анатолий Осипов санаатын үллэстэр.
Саамай уһун 3000 дистанцияҕа барыларыттан, ол эбэтэр хас да сыл дьарыктаах оҕолортон ордугун көрдөрөн, Кэмпэндээйи кэскиллээх ыччата Гена Прокопьев кыайан, мустубут дьону уонна ыалдьааччыларын үөртэ.
Кэмпэндээйи олохтоохторо быйылгы сүүрүү хаһааҥҥытааҕар да олус тэрээһиннээхтик, өрө көтөҕүллүүлээхтик уонна соһуччу көрдөрүүлэрдээх ааспытын бэлиэтииллэр.
Алексей Яковлев – Сүүрүк Дьаакыбылап сыдьааннара – Сунтаар ыччаттарыттан кэскиллээх сүүрүктэр үүннүннэр!

Айтана Аммосова
бэлэмнээтэ.