Уһулуччуларга – мөлүйүөн!

IMG_8857-Copy

Балаҕан ыйын 12 күнүгэр Саха Өрөспүүбүлүкэтин Ил Дархана Егор Борисов бүгүҥҥү күн чулуу спортсменнарын кытта көрүстэ. Көрсүһүүгэ тустууктар Виктор Лебедев, Айаал Лазарев, боксер Василий Егоров, сүүрүк Сардаана Трофимова, пауэрлифтер Владимир Балынец, харбааччы Анастасия Диодорова, охчут Степанида Артахинова уонна волейболист Алена Дмитриева бааллар.

Ил Дархан көрсүһүү кэмигэр: «Күүстээх үлэни, дьарыгы көрсөн Олимпиадаҕа уонна Паралимпиадаҕа барар быраабы ылбыппыт. Олимпиадаҕа кыттыбыт спортсменнарбыт үрдүк көрдөрүүлэниэхтэрин, мэтээллэниэхтэрин уопут тиийбэтэ. Спортсменнарбыт кыттыбыт күрэхтэһиилэрин ахсын кыайаллара, онон Олимпиадаттан мэтээли аҕалыахтара диэн күүппүппүт. Ол эрээри, аан дойду үрдүнэн күүстээхтэр тахса тураллар, ону учуоттуохха наада. 2020 сылга Токиоҕа буолар Олимпиадаҕа бэлэмнэниини билиҥҥэттэн саҕалыахха», – диэн бэлиэтээн эттэ.
Оттон боксер Василий Егоров көрсүһүүгэ маннык диэн эттэ: «Мин кыһыл көмүс мэтээли ылыахпын баҕарбытым. Бу туһугар өр дьарыктаммытым. Түөрт сыл устата Олимпиаданан эрэ олорбутум. Спорка ким эрэ кыайыылаах, ким эрэ хотторуулаах буолар. Санааны түһэрбэккэ өссө күүскэ бэлэмнэниэхпит, кэлэр Олимпиадаҕа ситиһиилэрдэниэм диэн эрэннэрэбин».
Төһө даҕаны Паралимпиадаҕа Россия сүүмэрдэммит хамаандата кыттыбатаҕын иһин, путевка ылбыт паралимпийецтарбытыгар уонна олимпиецтарбытыгар сыралаах үлэлэрин, ситиһиилэрин иһин Ил Дархан биирдии мөлүйүөннүү солкуобайдаах сертификаттары туттарда. Россия Паралимпиадатын кыайыылаахтарыгар (Степанида Артахинова түмүгэ биллэ илик), Егор Борисов «туспа наҕараада баар буолуо» диэн эрэннэрдэ.
Саха Өрөспүүбүлүкэтин Ил Дарханын 1390 №-дээх ыйааҕынан Спорт үрдүкү маастарыстыбатын оскуолатын спортсмен-инструктора, Россия спордун үтүөлээх маастара, көҥүл тустууга Россия 5 төгүллээх, аан дойду икки төгүллээх чөмпүйүөнэ, аан дойду чөмпүйэнээтин боруонса мэтээлин хаһаайына, бастакы Европейскай оонньуулар чөмпүйүөннэрэ, быйылгы Риотааҕы Олимпиада кыттыылааҕа Виктор Лебедев уонна харбааһыҥҥа аан дойду, Европа уонна Россия хас да төгүллээх чөмпүйүөнэ, Пекиннээҕи Олимпиада үрүҥ көмүс призера Анастасия Диодорова Саха сирин саамай үрдүк наҕараадатынан – «Хотугу сулус» уордьанынан наҕараадаланнылар.
Киэн туттар спортсменнарбыт үрдүкү наҕарааданы ылыахтаахтарын ыллылар. Ол эрээри, ыйаахха Виктор Лебедев аан дойду 5 төгүллээх чөмпүйүөнэ диэн сурулла сылдьар. Быйылгы айдааннаах Россия чөмпүйэнээтин кэнниттэн, Викторы Россия 6 төгүллээх чөмпүйүөнэ диэн билиммиппит. «Бу чөмпүйэнээт кэнниттэн, ол аата Виктор чөмпүйүөн аатыттан аккаастаммыт буолан тахсар дуо?» – диэн ыйытыы көҥүл тустуу сэҥээрээччилэрин мунаахсытта.

Айтана АММОСОВА.