Аадырыстаах көмө

домик

Олоххо араас буолар. Эмтэнии, дьиэни гааска-уокка холбонуу, баһаартан эмсэҕэлээһин, сарбыллыыга түбэһэн үлэттэн уурайыы, о.д.а. ыарахан балаһыанньаҕа киирдэххэ, судаарыстыбаттан көмө көрдүөххэ сөп. Аадырыстаах көмө диэн — чопчу ханнык эрэ балаһыанньаҕа оҥоһуллар харчынан көмө. Сороҕор киһи ыксаллаах балаһыанньаҕа түбэһэн, иннин-кэннин билбэккэ, соҕотоҕун тула холоруктаан хаалара баар суол. Киниэхэ чугас дьоно эрэ буолбакка, судаарыстыба эмиэ көмөлөһүөн сөп. Чуолаан, өрөспүүбүлүкэ өттүттэн чопчу төһө суумалаах көмө оҥоһулларын бу инфографикаттан көрүөҕүҥ.
СӨ Үлэҕэ, социальнай сайдыыга министиэристибэтин 2016 сыл тохсунньу 1 күнүнээҕи дааннайдара туһанылыннылар.

Олорор дьиэлэргэ гаас киллэрэргэ аадырыстаммыт көмө
— кээмэйэ биир дьиэҕэ 100 тыһ. солкуобай сууматтан тахсыа суохтаах.

Киин ититэр ситимҥэ холбонорго туһуламмыт көмө:
— бастакы зонаҕа (Арктика улуустарыгар) — 140 тыһ. солк.
— иккис зонаҕа — 125 тыһ. солк. тахсыа суохтаах.

Электричествонан ити­тиигэ холбонууга аадырыстаммыт көмө
— биир дьиэҕэ 50 тыһ. солкуобайтан элбэҕэ суох буолуохтаах. Бу көмө СӨ бырабыыталыстыбата “Ньурба уонна Сунтаар улуустарыгар олорор дьиэлэри электричествонан ититиигэ холбооһуҥҥа гражданнар сорох араҥаларыгар биирдэ бэриллэр аадырыстаммыт материальнай көмөнү оҥоруу балаһыанньатын бигэргэтии” диэн 2013 сыл кулун тутар 4 күнүнээҕи Уурааҕар олоҕуран оҥоһуллар.

Үлэлээбэт, кыаммат ыалга, эбэтэр соҕотох олорор, үлэлээбэт киһиэхэ социальнай хантараах быһыытынан судаарыстыба көмөтө
— ый аайы бэриллэр социальнай көмө кээмэйэ кыаммат ыал эбэтэр гражданин дохуоттарын уонна ыйдааҕы тиийинэн олоруу кээмэйин араастаһыытынан ааҕыллар.
Биирдэ бэриллэр социальнай көмө кээмэйэ социальнай хантараах хас ыйга түһэрсиллибититтэн уонна ыйдааҕы социальнай көмө кээмэйиттэн тутулуктаах. Кыаммат араҥаҕа киирсэр, үлэлээбэт буоллаххытына, сиһилии олорор сиргит социальнай управлениетыттан баран билсиэххитин сөп.

Ангелина ВАСИЛЬЕВА.