Лөгөй инники эрэллэрэ

DSC_0081

Уус Алданнааҕы оҕо спортивнай оскуолатын көҥүл тустууга филиаллара Лөгөйгө, Тандаҕа, Сыырдаахха, Суоттуга, Дүпсүҥҥэ уонна Мүрүгэ аһыллан үлэлииллэр. Лөгөйгө тиийэ сылдьан нэһилиэк дьаһалтатын тыа хаһаайыстыбатыгар исписэлииһэ Иван Борисов сүбэтинэн, эдэр тустууктар эрчиллиилэригэр сырыттым. Ити күн бөһүөлэк үрдүнэн электричество уота суох буолан, тустууктар эрчиллиилэрэ таһырдьа, спорт былаһааккатыгар ыытылынна.

Эрчиллиини олохтоох ыччат, бэйэтин кэмигэр “Боотурдар оонньууларын” (2004), Нерюнгрига ыытыллыбыт Уһук Илин федеральнай уокурук (2002), Олимпийскай эрэл училищетын аһаҕас түһүлгэтин (2005) кыайыылаахтара, өрөспүүбүлүкэ уолаттарга (2005) уонна Уһук Илин ФУо эр дьоҥҥо (2011) чөмпүйэнээттэрин боруонса призера Сергей Бурнашев салайан ыытта. Кини Уус Алданнааҕы оҕо спортивнай оскуолатын Лөгөйдөөҕү филиалын көҥүл тустууга тренеринэн иккис сылын үлэлиир.
— Эрчиллиибитин балаҕан ыйын 2 күнүттэн саҕалаатыбыт, — диир эдэр тренер. — Икки бөлөҕүнэн барыта отучча оҕо дьарыктанар. Оскуолабыт интэринээттээх буолан, манна аҥардас Кэптэни эрэ оҕолоро буолбакка, чугас сытар Даалыттан, Баатаҕайтан эмиэ бааллар. Сүрүннээн саҥа дьарыктанан эрэр оҕолор. Син баҕалаахтар, эрчиллиини көтүппэттэр. Кинилэр ортолоругар улуус чөмпүйүөннэрэ уонна призердара бааллар. Оттон Володя Перевалов уонна Вадим Прядезников быйыл Чурапчы Дириҥэр ыытыллыбыт өрөспүүбүлүкэтээҕи турнирга туһааннааҕынан иккис уонна үһүс миэстэлэргэ таҕыстылар. Олимпийскай чөмпүйүөн Павел Пинигин бирииһигэр Юра Петухов биэс эргиир тустан, куһаҕана суох көрдөрүүлэммитэ…
Эрчиллиигэ сүрүннээн албастары үөрэтэбит, күүһү-уоҕу хачайдааһыҥҥа болҕомтону уурабыт, имигэс, ууннаҥнас буолалларын инниттэн сахалыы ыстаныылары оҥоробут. Тренер Н.Р.Крылов эрчийэр методикатын туһанабын. Манна даҕатан эттэххэ, быйыл кыһын биһиги эрчиллиибитигэр куораттан биир дойдулаахтарбыт: норуоттар икки ардыларынааҕы кылаастаах спорт маастара Афанасий Заболоцкай, тренер Николай Крылов, улуус мунньаҕын дьокутаата Леонид Сергеев састааптаах бөлөх кэлэн, тустуу сайдыытыгар анаан маастар-кылаас тэрийбитэ. Эрчиллэргэ наадалаах инвентарь бэлэхтээбиттэрэ.

Сергей Бурнашеву кытта кэпсэтэн биллэххэ, лөгөйдөр күрэхтэһиилэргэ сүрүннээн эрчиллэр оҕолор төрөппүттэрин күүһүнэн бараллар-кэлэллэр эбит. Туораттан массыына кэпсэтэн, харчы бырахсан… Итинник көстүү тыа сирин спордугар барытыгар баара биллэр. Сергейгэ баҕарыам этэ, инникитин нэһилиэк дьаһалтатын, оскуола салалтатын кытта ыкса сибээстээхтик үлэлииригэр. Манна сыһыары тутан эттэххэ, лөгөйдөр быйыл ахсынньы ыйга саҥа, таас оскуолаҕа киирээри сылдьаллар. Онно, филиал иитиллээчилэригэр анаан усулуобуйа тэриллэрэ буоллар, дэлэлээх үчүгэй буолуо этэй?!
Эдэр тренер былаана киэҥ. Төһө
даҕаны ыараханын иһин, күрэхтэһии­лэргэ, үөрэтэр-эрчийэр түмсүүлэргэ элбэхтик кыттар баҕалаах. Өссө улуус атын филиалларын ыҥыран, сотору кэминэн аһаҕас күрэхтэһии тэрийэр баҕалаах. “Күрэстэһии, илин былдьаһыы баар буоллаҕына эрэ сайдыыга кэлэбит”, — диир. Сергей ити этиитэ бөҕөх санааны, инникигэ эрэли үөскэтэр. Син эмиэ биир дойдулаахтара Семен Петухов, Михаил Петухов, Анатолий Олесов, Николай Олесов курдук өрөспүүбүлүкэҕэ биллэр тустууктар үүнэн тахсалларыгар, дойдуларын ааттаталларыгар баҕарабыт.

Петр ПАВЛОВ.