Петр Копылов – аан дойду чөмпүйүөнэ

копылов

Аҕыйах хонуктааҕыта биир дойдулаахпыт, Олимпийскай эрэл училищетын үөрэнээччитэ Петр Копылов Грузия Тбилиси куоратыгар ыытыллыбыт көҥүл тустууга аан дойдуга уолаттарга чөмпүйэнээтиттэн кыайан-хотон, дойдутугар эргилиннэ. Үөрүүлээх сонуну үллэстэ, сыралаах үлэнэн ылыллыбыт кылабачыгас кыһыл көмүс мэтээли көрдөрө, бэҕэһээ өрөспүүбүлүкэтээҕи медиацентрга эдэр чөмпүйүөн суруналыыстары кытта көрүстэ.

Манна чөмпүйүөнү кытта Саха Өрөспүүбүлүкэтин спордун миниистирин солбуйааччы Георгий Балакшин, Ил Түмэн дьокутаата, Олимпийскай эрэл училищетын дириэктэрэ Алексей Филиппов, көҥүл тустууга Саха сирин уолаттарга сүүмэрдэммит хамаандатын тренерэ Прокопий Иванов уонна Петр тус тренерэ Яков Филиппов кыттыыны ыллылар.
Саха Өрөспүүбүлүкэтин спордун миниистирин солбуйааччы Георгий Балакшин Петр ситиһиитин бэлиэтээн уонна историяттан быһа тардан, кыайыы сыанатын кэпсээтэ:
— Маннык таһымнаах күрэхтэһиигэ сахалартан 1969 сыллаахха Илларион Федосеев кыайа сылдьыбыта. Ол ситиһиини 28 сыл ааспытын кэнниттэн Дмитрий Михайлов хатылаан, сахалары үөрдүбүтэ. Аны былырыын Боснияҕа уонна Герцеговинаҕа буолбут уолаттар аан дойдутааҕы түһүлгэлэригэр саха тустуутун инники кэскиллэрэ Иван Оконешников уонна Алексей Копылов кыайталаабыттара. Ол суолунан, быйыл Алексей игирэ инитэ Петр кыһыл көмүс мэтээлгэ ситистэ. Бу аата көҥүл тустууга уолаттарга Саха сирин сүүмэрдэммит хамаандатын тренердэрин састааба күүстээҕин, кыахтааҕын туоһулуур.
Оттон Петр билии-көрүү киэҥ эйгэтин ыла сылдьар Олимпийскай эрэл училищетын дириэктэрэ Алексей Филиппов үөрэнээччитинэн киэн тутта тыл эттэ:
— Сорох киирсиилэргэ Петр аҕыйах сөкүүндэ хаалбытын кэнниттэн соһуччу кыайталаата. Бу киһи күүстээх майгылааҕын, тостубатын туоһулуур дии саныыбын. Атын киһи маннык түбэлтэҕэ бэринэн, ыһык­тынан да кэбиһиэн сөп курдук. Биһиги Петрбыт оннук гыммата. Күрэхтэһиини барытын быһа сибээскэ көрбүтүм, Петрбытыгар көҥүл тустууга уолаттарга Россия сүүмэрдэммит хамаандатын сүрүн тренерэ Анзор Темботов ыалдьа олорорун көрөн аһарбытым. Олус күүрээннээх, тыҥааһыннаах киирсиилэри көрдөрдө.
Аҕа дьон сүбэтин-аматын, эҕэрдэтин кэнниттэн, тылы чөмпүйүөҥҥэ биэрдилэр:
– Бу кыайыы мин саҕалааһыным буолар, онон олус эппиэтинэстээх күрэхтэһии буолла. Күрэхтэһэрбэр улаханнык долгуйбатаҕым, бэйэбэр кыайыам диэн эрэллээх этим. Биир үксүн, Тбилисигэ билэр дьонум кэлэн миэхэ ыалдьыбыттара күүс эптэ дии саныыбын. Ньиэмэс тустууга Хорст Лердыын ыарахан киирсии буолла, баалынан хотторон иһэн, уон сөкүүндэ хаалбытын кэнниттэн албастааммын кыайдым. Күрэхтэһии иннинэ үчүгэйдик сынньаммытым. Утарсааччыларым киирсиилэрин, тиэхиньикэлэрин интернеккэ көрөн, кичэйэн үөрэппитим. Киирсэр күммэр аһаан-сиэн баран, дьарыктанар саалаҕа утуйан ылбытым уонна дьарыктаммытым. Ол кэнниттэн хайаан да кыайабын диэн бэйэбин бырагыраамалаан баран, түһүлгэҕэ тахсыбытым.
Уолаттар түһүлгэлэриттэн улахан дьон бөлөҕөр көспүт тустууктар олус элбэхтэр. Онон Петры салгыы тустуук быһыытынан сөпкө эрчийдэххэ, улахан дьон бөлөҕөр тахсан, ситиһиилэри аҕалыан сөп.

Айтана АММОСОВА.