«Ростелеком» Уус Алдан оскуолаларыгар энергияны кэмчилиир үлэни ыытыа

DSC_1008

2017 сыл бүтүөр диэри Уус Алдан улууһугар үөрэҕирии салаатын 26 тэрилтэтин ититэр ситимнэрин саҥардан, хапытаалынай өрөмүөн ыытыахтара. Бу киэҥ далааһыннаах үлэни ыытыыга бүддьүөттэн биир даҕаны үп көрүллүбэккэ, аҥардас «Ростелеком» ПАУо Саха сиринээҕи филиала «Сахателеком» суотугар ыытыллыахтааҕын туһунан улуус баһылыга Алексей Федотов биһиги хаһыаппытыгар иһитиннэрдэ.

Үйэтин тухары сибээс сайдыытынан дьарыктанан кэлбит бөдөҥ хампаанньа бу күннэргэ Уһук Илин регионугар аан бастакынан Уус Алдан улууһун дьаһалтатын кытары энергосервиснэй хантараак түһэристэ. Энергосервиснэй хантараак быһыытынан тэрилтэ биир да солкуобайы төлөөбөккө, аҕыйах кэм устата хаачыстыбалаах өрөмүөн ыыттарар.
Дуогабар чэрчитинэн, «Ростелеком» хас биирдии эбийиэккэ ититии ситимнэрин көрөр-истэр, бэрээдэктиир автоматическай тэриллэри туруортаан, барытын куораттан хонтуруоллуу олоруохтара. Ону таһынан дьиэлэри аныгы олох ирдэбилигэр эппиэттиир сылааһы тутар тутуу матырыйаалларынан иһиттэн-таһыттан бүрүйүөхтэрэ. «Түүҥҥү өттүгэр уонна өрөбүл күннэргэ үөрэх тэрилтэлэригэр температура арыый да намтаан, кэмчилээһин ол суотугар барыахтаах. Оттон үөрэх кэмигэр эрдэттэн туруоруллубут (заранее установленная) биир температура туруоҕа. Оҕолор тоҥуохтара суоҕа», – диэн «Ростелеком» ПАУо Саха сиринээҕи филиалын дириэктэрэ Алексей Семенов эрэннэрэр.
Бу үлэни ыытыыга хампаанньа бэдэрээтчитинэн «Энергосберегающие технологии» диэн чааһынай тэрилтэни талбыт. Тэрилтэ Горнай, Томпо, Нам улуустарыгар биирдиилээн тэрилтэлэри кытары энергияны кэмчилээһиҥҥэ үгүс үлэни ыыппыт улахан уопуттаах. Кини дьиэлэр туруктарын үөрэтэн, көрөн-истэн баран, сылааһы харыстыырга аналлаах үлэлэри ыытыаҕа. Ааны, түннүгү уларытар, дьиэни сылааһы тутар матырыйаалынан эпсиэйдиир, аныгы технологиянан оҥоһуллубут ититэр ситими уларытыахтаах.
Энергосервиснэй хантараак түһэрсэн Уус Алдан улууһа үөрэҕирии салаатын өрө тардыыга бастакы хардыылары оҥордо. Аны балтараа сылынан үөрэҕирии салаатын 39 эбийиэгэ саҥардыллан, сыыйа үбү-харчыны кэмчилээһин баран, олохтоох бүддьүөккэ үтүө эрэ дьайыылаах буолуоҕун «Ростелеком» ПАУо бэрэстэбиитэлэ этэр.
Россия бөдөҥ хампаанньата тыа сиригэр дьон олоҕо-дьаһаҕа тупсарын туһугар үлэлиирэ хайҕаллаах суол. Энергосервиснэй хантараак тыа сирин олохтоохторун олорор усулуобуйаларын тупсарарга көдьүүстээх ньыма буолара саарбахтаммат.

Анивера АКИМОВА.