Тыйаатырдар ааннарын астылар

сат3

Быйылгы 111-с сезона Былатыан Ойуунускай аатынан Саха академическай тыйаатырыгар уратылаах, ол курдук, үбүлүөйдээх 110 сылын бэлиэтиир уонна кэлэктиип кэлэр ыйга Евразия Бишкек, Алма-Ата, Астана, Казань, Уфа уонна Москва куораттарынан, СӨ Бырабыыталыстыбатын өйөбүлүнэн, “Саха тыйаатырын номохторо” диэн улахан гастрольнай айаҥҥа турунар.

Балаҕан ыйын 20 күнүгэр кэлэктиип уоппускаттан мустан, саҥа сезонун репертуарын, үбүлүөйгэ аналлаах, 60 киһилээх улахан гастроль боппуруостарын дьүүллэстэ, төрөөбүт күннээх, ситиһиилээх дьонун эҕэрдэлээтэ.
Кэлэктиип уус-уран салайааччыта Андрей Борисов, тыйаатыр дириэктэрэ Анатолий Николаев үлэни-хамнаһы, былааннары билиһиннэрдилэр, бэлиэ сылга кэлэктиип иннигэр саҥа соруктары туруордулар.
Дьэ, ханнык испэктээкиллэрин илдьэ баран, Саха тыйаатыра Евразияны сөхтөрөр?!
— Бу күннэртэн эрэпэтииссийэлэри саҕалыыбыт. Гастролга, Саха тыйаатырын Бүтүн Россияҕа, тас дойдуларга дорҕоонноохтук ааттаппыт, бэлиэ, визитка-испэктээкиллэрбитин илдьэ барыахпыт. Ол — бастатан туран, Ч.Айтматов “Хаарыан хампа күөх кытылым…”, Өксөкүлээх Өлөксөй “Ойуун түүлэ”, У.Шекспир “Илиир Хоруол”, “ТииТ”, Г.Лорк “Иччитэх дьиэ”. Оттон гастролу Москваҕа биһиги уус-уран салайааччыбыт, РФ норуодунай артыыһа, режиссер Андрей Борисов туруоруутугар сабыс-саҥа испэктээкилинэн — Бертольд Брехт айымньыларынан “Мамаша Кураж” премьератынан түмүктүөхпүт, — диэтэ Анатолий Павлович.
Быйылгы үбүлүөйдээх сылыгар Саха тыйаатыра көрөөччүтүн саҥа испэктээкиллэринэн үөрдүөҕэ. Ол курдук, Иван Гоголев-Кындыл остуоруйаларынан оҕолорго аналлаах “Кыталыктар кырдаллара” айымньы туруоҕа. Бырайыак ааптара — тыйаатыр кылаабынай худуоһунньуга Лена Гоголева. Итиэннэ Николай Лугинов “Хуннские повести”, Олоҥхо тыйаатырын кытта “Бэрт киһи Бэриэт Бэргэн” олоҥхо премьералара туруоруллуохтара.
Манна даҕатан эттэххэ, 1906 сыллаахха, тохсунньу 3 күнүгэр сценаҕа чуолаан бу “Бэрт киһи Бэриэт Бэргэн” олоҥхо Дьокуускай куоракка аан бастаан сахалыы тылынан туруоруллубута.
Оттон Саҥа дьыл иннинэ үбүлүөйдээх тэрээһиннэр ыытыллыахтара итиэннэ тыйаатыры таптааччылар ааспыт сезоннарга сөбүлээбит испэктээкиллэрин дуоһуйа көрүөхтэрэ.

Татьяна МАРКОВА.