Ыарахан балаһыанньаҕа түбэспит дьоҥҥо

помощь1

Саха Өрөспүүбүлүкэтигэр олохтоммут тиийинэн олоруу алын кээмэйиттэн (ортотунан) тутулуктаах.

1. Оҕону, эбэтэр инбэлиити анал тэрилтэҕэ эмтэтээри өрөспүүбүлүкэ тас өттүгэр тиийэн олорорго уонна аһыырга — тиийинэн олоруу алын кээмэйин 2 төгүллээх суумата. СӨ доруобуйа харыстабылын министиэристибэтин “направлениетынан” баран эмтэнэр эрэ дьоҥҥо төлөнөр. Дьиэ кэргэн, эбэтэр аҥардас киһи дохуота тиийинэн олоруу алын кээмэйин икки төгүллээх сууматыттан кыра буолуохтаах.

2. Өрөспүүбүлүкэ тас өттүгэр тахсан анал тэрилтэлэргэ доруобуйаҕын көрдөрүнэргэ, эмтэнэргэ, чөлүгэр түһэринэргэ 2 ыйтан ордуга суох олорорго, аһыырга көмө суумата ыйдааҕы
тиийинэн олоруу алын кээмэйигэр тэҥнэһэр. Манна дьиэ кэргэн, эбэтэр аҥардас киһи дохуота тиийинэн олоруу алын кээмэйин 1,5 төгүллээбиттэн кыра буолуохтаах.

3. Босхо медицинскэй өҥө судаарыстыбаннай гарантиятын территориальнай бырагырааматын таһынан оҥоһуллар медицинскэй өҥөҕө, эмкэ төлөбүргэ — ороскуот кээмэйинэн (ол эрээри тиийинэн олоруу кээмэйин 1,5 төгүллээх сууматыттан таһынан барыа суохтаах). Дьиэ кэргэн, аҥардас киһи ыйдааҕы дохуота бу тиийинэн олоруу алын кээмэйин 1,5 төгүллээх сууматыттан кыра буолуохтаах.

4. Диалиһынан эмтэнэр инбэлиит атын сиргэ көһөн баран олорор ороскуотугар — тиийинэн олоруу кээмэйин 5 төгүллээх суумата. Дьиэ кэргэн, эбэтэр аҥардас киһи ыйдааҕы дохуота тиийинэн олоруу алын кээмэйин 2 төгүллээх сууматыттан кыра буолуохтаах.

5. Элбэх оҕолонуу, үлэттэн уурайыы, инбэлииккэ тахсыы курдук биричиинэлэринэн аһы-үөлү, таҥаһы атыылаһарга көмө (ыйдааҕы дохуот тиийинэн олоруу алын кээмэйиттэн кыра буолуохтаах):
— сокуоннай саастарын туола илик 3 уонна онтон аҕыйах оҕолоох дьиэ кэргэҥҥэ — тиийинэн олоруу алын кээмэйин аҥарын саҕа суума бэриллэр.
— сокуоннай саастарын туола илик 3 уонна онтон элбэх оҕолоох дьиэ кэргэҥҥэ — тиийинэн олоруу алын кээмэйин саҕа суума бэриллэр.
— соҕотох олорор киһиэхэ — тиийинэн олоруу алын кээмэйин аҥарын саҕа суума бэриллэр.

6. Баһаартан эмсэҕэлээбит дьоҥҥо туттар мал-сал ылыналларыгар көмө (ыйдааҕы дохуот тиийинэн олоруу алын кээмэйин 2 төгүллээх сууматыттан кыра буолуохтаах):
— олорор дьиэ толору умайбыт буоллаҕына — дьиэ кэргэҥҥэ тиийинэн олоруу алын кээмэйин 3 төгүллээх сууматын уонна хас биирдии чилиэнигэр тиийинэн олоруу алын кээмэйин аҥарын (барыта тиийинэн олоруу алын кээмэйин 5 төгүллээх сууматыттан үрдүк буолуо суохтаах).
— дьиэ сороҕо умайбыт буоллаҕына — дьиэ кэргэҥҥэ тиийинэн олоруу алын кээмэйин 2 төгүллээх сууматын саҕа харчынан көмө оҥоһуллар.

Ангелина ВАСИЛЬЕВА.