Искусство оскуолатыгар

Гдо2

Аныгы кэм ирдэбиллэринэн, Оҕо искусствотын оскуолаларын салгыы сайыннарар, тупсарар туһугар быйыл балаҕан ыйыгар СӨ Ил Дарханын дьаһалынан, 2016-2020 сылларга СӨ Оҕо искусствотын оскуолаларын сайыннарыы Кэнсиэпсийэтэ ылылынна.

Биллэрин курдук, быйыл өрөспүүбүлүкэ үс биэдэмэстибэтинэн – Үөрэх, Култуура уонна духуобунай сайдыы итиэннэ Спорт министиэристибэлэринэн, Саха сиригэр биллэриллибит Эбии үөрэхтээһин сылын соруктара олоххо киллэриллэллэр.
Онон, оҕону эбии үөрэхтээһиҥҥэ, бу кэскиллээх хайысхаҕа өтөрүнэн буолбатах сэргэхсийии, хамсааһын тахса турар. Бу иннинэ оҕо художественнай, музыкальнай оскуолаларыгар, сымнатан эттэххэ, болҕомто тиийбэт этэ. Ол, ДШИ-лэр ситимнэрин кииннэммит салайыы, нормативнай-правовой база суоҕар, информационнай-методическай үлэ күүһүрдүүнү эрэйэригэр, материальнай-техническэй база мөлтөҕөр эмиэ көстөрө.
Култуура уонна духуобунай сайдыы миниистирэ Владимир Тихонов этэринэн, өрөспүүбүлүкэҕэ ДШИ-лэр үлэлэрин тупсарарга, систиэмэни тутан олорон, филиаллары сайыннаран, үөрэнэр оҕо ахсаанын улаатыннарар, чааһынай оскуолалары сайыннарар туһугар табыгастаах усулуобуйалары тэрийэр наада. Итиэннэ, култуура, искусство эйгэтигэр кэнэҕэски каадырдары бэлэмниир туһуттан, талааннаах, айдарыылаах оҕолору эрдэттэн булууга, талан ылан сайыннарыыга уопсастыбаннас, педагогтар улахан болҕомтолорун уураллара наадалааҕын ыйар кини.
Миниистир В.И. Тихонов, бу докумуон олоххо киириитэ култуура уонна искусство эйгэтигэр бүттүүнүгэр үөрэхтээһин көдьүүһүн, хаачыстыбатын үрдэтиигэ итиэннэ 2020 сылга өрөспүүбүлүкэ оҕотун 75 %-нын эбии үөрэхтээһининэн хааччыйыыга көмөлөһүөҕэ, диэн бэлиэтиир.
Билиҥҥитэ, аныгы ирдэбиллэргэ эппиэттэһэр хааччыллыылаах оҕо искусствотын оскуолалара Амма сэлиэнньэтигэр, Хаандыга бөһүөлэгэр уонна Нерюнгри куоракка бааллар. Оттон Анаабыр уонна Эбээн-Бытантай улуустарыгар оҕо искусствотын оскуолата диэн олох да суох.
Дьэ онон, ДШИ-лэри — оҕо искусствотын оскуолаларын сайыннарыы Концепциятын чэрчитинэн материальнай-техническэй базаны тупсарыы, саҥардыы барыахтаах. Ол эбэтэр, билиҥҥи кэмҥэ үгүс оскуолалар, ордук тыа сиригэр, саахалланар туруктаахтар. Хапытаалынай өрөмүөнү эрэйэллэр. Хас да оскуола ааспыт үйэ 40-c, 50-c сыллардааҕы тутууларга, оттон сорохтор арендаламмыт дьиэлэргэ үлэлии олороллор.
Төһө даҕаны, усулуобуйа үгүс сирдэргэ мөлтөх буоллар, энтузиаст, бэйэлэрин идэлэригэр бэриниилээх дьон дьулуурдарынан, биһиги өрөспүүбүлүкэбитигэр 84 оҕо искусствотын уонна музыкальнай оскуолалар айымньылаахтык үлэлииллэр. Манна 15374 оҕо үөрэнэр.

Татьяна МАРКОВА.