Уот тарыыба үрдээбэт!

rus143451858765

Үгүс араллааны, санаа хайдыһыытын таһаарбыт быыбардар түмүктэнэн, эмиэ күннээҕи кыһалҕаларбытыгар төнүннүбүт. Бу күннэргэ WhatsApp социальнай ситимҥэ «уот тарыыба үрдүүр үһү!», «талыллыбатах Тарааһап сыананы өстөһөн үрдэттэ!» диэн сурах-садьык тарҕанна. Өссө, киһи итэҕэйиэн курдук, «Якутскэнерго» ПАУо Энергосбытын аатыттан тарҕаппыттар.

Сыана сылга биирдэ бигэргэнэр

Коммунальнай төлөбүрдэр тустарынан биһиги хаһыаппытыгар «Эйиэхэ, туһанааччыга» уонна «Кумааһынньык» балаһаларбытыгар хаста даҕаны сырдатан, суруйан турабыт. Ол да буоллар, нэһилиэнньэ ортотугар өйдөммөт түгэн уонна сымыйа сурах тарҕаммытынан, уот тарыыбын туһунан эмиэ суруйарга сананныбыт.
Аҕыйах сылтан бэттэх дьиэ-уот уонна коммунальнай төлөбүрдэр тарыыптара сылга биирдэ – от ыйын 1 күнүттэн олохтонор буолбута. Бу туһунан СӨ Сыана бэлиитикэтигэр судаарыстыбаннай кэмитиэтин бэрэссэдээтэлэ Антонина Винокурова биһиги хаһыаппытыгар биэрбит интервьютугар этэн турар.

Коммунальнай уонна дьиэ-уот төлөбүрэ араастаһаллар

Дьиэ-уот уонна коммунальнай төлөбүрдэри судургутук «квартплата» диэн ааттыыбыт. Ол эрээри мантыбыт тус-туһунан өйдөбүллээх, атын-атын хармааҥҥа киирэр төлөбүрдэр. Коммунальнай өҥөлөргө электроэнергиянан, сылааһынан, гааһынан, итии, тымныы уунан, канализациянан туһаныы төлөбүрдэрэ ааҕыллаллар. Олорор дьиэ (жилищные) төлөбүрүгэр техническэй хааччыйыы, бөҕү-саҕы таһыы, дьиэ территориятын, подъеһы ыраастааһын-хомуйуу курдук өҥөлөр киирэллэр. Өссө икки сылтан бэттэх, хапытаалынай өрөмүөҥҥэ төлөбүр туһунан квитанция кэлэр буолла.
Коммунальнай өҥөлөр тарыыптарын бигэргэтиини, бэрээдэктээһини судаарыстыба хонтуруоллуур эбит буоллаҕына, олорор дьиэ иһин төлөбүрдэргэ бырабыыталыстыба да, муниципалитет да кыттыһар кыаҕа суох. Сыананы дьиэни бас билээччилэр бэйэлэрэ куоластаан, мунньахтаан быһаллар. Онон сыананы салайар хампаанньалар, ТСЖ-лар бигэргэтэллэр.

1 кВт – 3 солк. 83 харчы

Электроэнергия төлөбүрүгэр төнүннэххэ, сыл иккис аҥаарыттан уот тарыыба 7,5% үрдээн, билигин куоракка гаас билиитэлээх дьиэҕэ олорооччулар 1 киловатт чаас иһин 5,47 солк. төлүүллэр. Былырыыҥҥыны кытары тэҥнээтэххэ, тарыып 38 солкуобайынан үрдээбит. Ол аата бэс ыйыгар диэри 1 киловатт чаас иһин 5 солк. 9 харчыны төлүү олорбуппут. Куоракка уонна тыа сиригэр олорор электрическэй билиитэлээх ыаллар 3,83 солкуобайы төлүүллэр. Ааспыт сылга 3 солк. 57 харчы этэ.

Анивера АКИМОВА.