“Чээчэбил” һээдьэтин кэриэйдэр биһирээтилэр

IMG_4956

Балаҕан ыйын 5-12 күннэригэр Соҕуруу Кэриэйэҕэ ыытыллыбыт “Динамичный Ванжу” диэн 24 дойду, 700 кэлэктиип кыттыылаах норуоттар икки ардыларынааҕы фестивалга 160 ансаамбылы кытта куонкуруска киирсэн, Уус Маайа улууһун Күп национальнай нэһилиэгин “Чээчэбил” норуодунай үҥкүү ансаамбыла III истиэпэннээх лауреат үрдүк аатын ылан, дойдутугар эргилиннэ.

Үтүө сонуну үллэстэр хаһан баҕарар үөрүүлээх. “Чээчэбиллэр” сарсыарда эрдэ “Саҥа күҥҥэ” тахсаат, сотору буолан баран биһиги эрэдээксийэбитигэр кэлэн ыалдьыттаатылар.
Норуодунай үҥкүү кэлэктиибин Алена Николаевна Барашкова салайар. Кини уонна Күп учаастактааҕы балыыһатын фельдшерэ Анна Михайловна Винокурова ыраах айаҥҥа оҕолору көрөн-истэн илдьэ сырыттылар.
Бу ансаамбыл Күп нэһилиэгин “Кыайыы 70 сыла” норуот айымньытын эбэҥки этно-култуурунай киинин иһинэн дьарыктанар. Ансаамбылы 90-с сылларга Любовь Павлова тэрийбит. Эбэҥки тылыгар “Чээчэбил” – ол аата “ыллыыр-туойар толоон” диэн суолталаах. Чахчы даҕаны, ансаамбыл оҕолоро – 7-11-с кылаастар үөрэнээччилэрэ, ыллаан-туойан, үҥкүүлээн, көрөөччүлэригэр мэлдьи умнуллубат кэрэ түгэннэри бэлэхтиир аналлаахтар.
Быйыл саас Аммаҕа ыытыллыбыт “Хотугу сулус” зонатааҕы телевизионнай куонкуруска “Чээчэбил” Гран-при ылары ситиспитэ, онтон сайын өрөспүүбүлүкэҕэ “Хотугу сулус” 20 сыллаах үбүлүөйдээх фестивалыгар эмиэ Гран-при буоланнар, кыайыыларын өссө чиҥэтэн биэрбиттэрэ.
— Россияттан уопсайа 15 кэлэктиип кыттыбытыттан биһиги бастакыбыт, оттон уопсай түмүккэ үһүспүт. Бастакы миэстэ – Соҕурууҥҥу Кэриэйэ 200 уол кыттыылаах байыаннай училище ансаамбыла буолла, оттон иккис – сингапурдар. Саха сириттэн Ньурба Маарыттан эмиэ үҥкүү бөлөҕө кыттыбыта, кинилэр харчынан бириис ыллылар.
Биһиги оҕолорбутун, “чээчэбиллэри” хара маҥнайгыттан сөбүлээбиттэрэ биллибитэ. Оннооҕор көрөөччүлэр ортолоругар “Чээчэбил!” диэн былакааттаах дьон баара биһигини сөхтөрбүтэ… Кыһыл-хара саһылбытын сэҥээрии бөҕөлөрө – хаартыскаҕа түсүһэргэ уочараттыыллар… Солистарбыт Айталина Оконешникова уонна Никита Ю эбэҥкилии “һээдьэлэрин” олус биһирээтилэр. Уопсайынан, омуктар “тыыннаах муусуканы” олус үрдүктүк сыаналыыллар эбит. Биһиги бу ситиһиибит “Хотугу сулустан” сыдьаайан таҕыста, онон, салайааччыбыт Татьяна Гоголеваҕа махталбыт улахан. Махтанабыт оҕолорбут төрөппүттэригэр уонна спонсордарбытыгар – көмүс хостуур “Дражник” уонна “Поиск” бириискэлэр салайааччыларыгар В.И.Артеменкоҕа уонна В.И.Степановка, кулууппут дириэктэрэ Анастасия Ильинична Ефремоваҕа уонна нэһилиэкпит баһылыга Аида Егоровна Борохинаҕа, — диир Алена Николаевна.
Ансаамбыл Соҕуруу Кэриэйэҕэ бу кыайыытын иһин харчынан бириэмийэҕэ сертификат туппутун оҕолор талааннарын салгыы сайыннарыыга туттуохтара.
Манна эбэн эттэххэ, чуолаан, нэһилиэк баһылыга Аида Борохина бу саас кулун тутарга баһылыктар мунньахтарыгар Ил Дархаҥҥа туруорсан, эбии үп көрүллэн, Күпкэ “Кыайыы 70 сыла” КСК олоххо киирбитэ.
Быйыл улуус — 85 сыла, оскуола үбүлүөйэ, “Хотугу сулус” — 20 сыла – Алдан кэрэ кытылыгар, Уус Маайа Күбүгэр олох күөстүү оргуйар.

Татьяна МАРКОВА.