Сайаапкалары биэрии сарсыҥҥыттан саҕаланыаҕа

IMG_1148

«Ахсынньыга диэри Госдума биир гектар туһунан сокуоҥҥа уларытыылары киллэриини көрүөҕэ», — диэн иһитиннэрдэ бу нэдиэлэҕэ РФ бырабыыталыстыбатын вице-премьерэ Юрий Трутнев Владивостокка ыыппыт мунньаҕар. Манна Ил Дархан Егор Борисов кыттан, Саха Өрөспүүбүлүкэтэ сири түҥэтиигэ бэлэмнэниитин туһунан иһитиннэрдэ.

Санатан эттэххэ, биир гектар туһунан 119-с нүөмэрдээх федеральнай сокуон иккис түһүмэҕэ бу алтынньы 1 күнүттэн саҕаланыахтаах. Бастакы түһүмэҕэ бэс ыйыттан саҕаланан, билигин пилотнай буолбут Нерюнгри оройуонугар 17 киһи сир быстаран ылан номнуо үлэлии-хамсыы сылдьар. Онтон олунньу 1 күнүттэн сокуон үһүс түһүмэҕэ киирэн, Россия бары олохтоохторо Уһук Илин тоҕус регионугар сайаапка биэрэн сирдэнэр кыахтаныахтара.
Мунньах кэмигэр Юрий Трутнев сокуон суолтатын бэлиэтээн туран, сокуоҥҥа уларытыылары киллэрии туһунан эттэ. «Эһиилгиттэн ыла бу сокуон Россия бары олохтоохторун таарыйыаҕа. Сокуон олус уустук, онон өссө да ситэриллэрэ-хоторуллара элбэх. Сокуоҥҥа бастакы уларытыылары саҥа талыллыбыт Госдума дьокутааттара ахсынньы 1 күнүгэр диэри көрөн ылыныахтаахтар. Оччотугар сокуон эһиилгиттэн толору үлэлииргэ бэлэм буолуох этэ», — диэн бэлиэтиир Юрий Петрович.
Туох уларыйыылар киириэхтэрэй? Бастатан туран, ойуурга сири ылыы быраабылата олохтонуоҕа, ону таһынан учаастактары быһан биэриигэ олохтоох былаас суолтатын күүһүрдүөхтэрэ. Манна даҕатан эттэххэ, бу саас Ил Дархан Нам улууһун дьонун-сэргэтин кытары көрсүһүүтүгэр, олохтоохтор «сирбит координатата сыыһа, каартаҕа атыны ыйа сылдьар» диэн долгуйалларын биллэрбиттэрэ. Бу кыһалҕа биһиэхэ эрэ буолбакка, атын регионнарга эмиэ тахсыталаабыт эбит. Онуоха вице-премьер: «Тоҕус региоммутуттан аҕыһыгар сирдэр координаталара каартаҕа сыыһа ыйылла сылдьаллар. Бу маны барытын билигин уларыта охсор уустук буолуоҕа, онон «Росреестр» улахан үлэни ыытан хайаатар да сирдэри дьаарыстыан наада. Онтон билигин наада буоллаҕына, миэстэтигэр тиийэн, исписэлиистэр сири хаттаан кээмэйдээтиннэр. Алтынньы 1 күнүттэн киирбит сайаапкалар бары сокуонунан көрүллүбүт бириэмэ иһигэр көрүллүөхтээхтэр. Ити булгуччу тутуһуллуохтаах», — диэн иһитиннэрдэ.
Маны таһынан губернатордар сорох нэһилиэнньэлээх пууннарга интернет суоҕун эбэтэр олус бытааннык үлэлиирин бэлиэтээтилэр. Манна туһаайан Юрий Трутнев нэһилиэнньэ сайаапкатын кумааҕыга суруйан олохтоох былааска киллэрэн биэрэр бырааптааҕын туһунан эттэ.
Түмүккэ өссө төгүл санатан этиим, алтынньы 1 күнүттэн саҕалаан Саха сирин олохтоохторо ханнык баҕарар улууска сайаапка түһэрэн, босхо биир га сири быстаран ылар көҥүлү ылыахпыт. Ону сэргэ сүөһүлээх-астаах дьон Ил Дархан олохтообут 2,5 гаатын, улахан хаһаайыстыбалаахтар 20 гааҕа диэри сири ылар кыахтааххыт.

Аграфена КУЗЬМИНА.