Саха сирин төһө билэҕин?

лидеры

Өрөспүүбүлүкэ күнүн көрсө «Эдэр саас» хаһыат суруналыыстара балаҕан ыйын 26 күнүгэр Бэчээт дьиэтигэр «Мин өрөспүүбүлүкэм» диэн ааттаах өй оонньуутун ыыттылар.

«Бу тэрээһин маҥнайгытын киэҥ араҥаҕа ыытылынна», – диэн кэпсиир оонньуу ааптара Яна Москвитина. Яна бу оонньуутун урут оскуола оҕолоругар уонна устудьуоннарга анаан ыыппыт эбит буоллаҕына, бүгүн Бэчээт дьиэтин медиа – киинигэр бу оонньуу ыччаты түмтэ. Сахабыт сирин киэҥ киэлитин, улуу дьоммут хантан төрүттээхтэрин туһунан о.д.а. тургутар ыйытыктарга оонньууга кэлбит 4 хамаанда эппиэттээтэ. Ол курдук, СГТХА устудьуоннарын идэлээх сойууһун, «Саха КВН», СӨ лидер кыргыттарын уонна Арктика оройуоннарын лидердэрин хамаандалара кэлэн күөн көрүстүлэр. Оонньуу ис хоһооно кыттааччы олорор сирин-уотун былыргытын уонна билиҥҥитин төһө билэригэр туһаайыллар. Ыйытыктар, чуолаан, биэс хайысхаҕа араарыллыбыттар. География, интэриэһинэй чахчылар, улуу дьон, история уонна оройуоннар гиэрбэлэрэ.
Кыттааччылар ыйытык бэриллибитин кэннэ 30 сөкүүндэ иһигэр хоруйдарын суруйан эппиэттииргэ бэлэмнэнэллэр. Эппиэттэрэ сөп түбэһэр түгэнигэр, остуолларын үрдүгэр сытар саха сирин каартатыгар биирдии биһээли (фишка) ууран иһэллэр. Оонньуу бүтүүтэ хайа хамаанда биһээлэ элбэх буолар да, ол хамаанда кыайыылаах үрдүк аатын сүгэр. Оонньооччулар толкуйдуур кэмнэригэр көрөөччүлэр кыттан, бэйэлэрин хоруйдарын биэрэн илиилэрэ күөрэҥнээн олордо.
Оонньууну сэргэ «Эдэр саас» суруналыыһа уулуссаҕа тахсан дьону көрсөн кэпсэппитэ «Skype» бырагыраама нөҥүө быһа көһүннэ.
Оксана Лугинова хапытааннаах СӨ лидер кыргыттарын хамаандата кыайыылаах үрдүк аатын сүктэ. Кыайыылаахтар анал дипломунан, наҕараадаланнылар. Атын хамаандалар ылбыт очукуолара кыайыылаахтан улахан аҕыйаҕа суох. Көрөөччүлэр өттүлэриттэн саамай элбэх сөп хоруйу биэрбит «Чолбон» сурунаал сүрүн эрэдээктэрин солбуйааччы Гаврил Андросов өйдөбүнньүк бэлэҕи тутта. Кини Сахабыт сирин историятын олус үчүгэйдик билэрин көрдөрдө.
Бэлиэтээн этэр буоллахха, «Мин өрөспүүбүлүкэм» оонньууну 2015 сыллаахха «СахаСелигер» форумҥа Яна бырайыак быһыытынан көмүскээбитэ. Оонньуу бырайыагын иһин гранҥа тиксибитэ.

Утум ЗАХАРОВ.