Улуустаһыыны күөртээмиэххэ

Саха сирин олохтоохторо түмсүүбүтүн көрдөрөр күммүт ааста. Ону баттаһа, оройуон ыччатыттан түмсүүлээх буолууну хайдах өйдүүллэрин, улуустаһыыны туох дии саныылларын ыйыталастыбыт.
Оптуорунньукка буолбут устудьуоннар охсуһууларын кэннэ бу боппуруос ордук сытыытык турда.

Тургун Попов, «Урааҥхай» кулууп салайааччыта:
— Бэҕэһээҥҥи охсуһуу туһунан араас сурах тарҕанна. Биһиги кулууппут дьоно онно суохтара. «Урааҥхай» атын сыаллаах. Спорду өрө тутабыт уонна патриотическай иитиинэн дьарыктанабыт. Оҕолор рингэҕэ киирсиэхтээхтэр, уулуссаҕа буолбатах.

Михаил Соловьев, чааһынай предприниматель:
— Мин хас даҕаны сыл устата улуус ыччаттарын түмсүүтүн бэрэссэдээтэлинэн үлэлии сылдьан үгүс үлэни ыыппытым. Ол иһигэр улуустаһыыны утары хас даҕаны тэрээһини тэрийбиппит. Кыра ычалаах, быстах санаалаах эрэ дьон улуустаһар дии саныыбын. Бу – урукку, ааспыт үйэ “муодата”. Билигин даҕаны урукку курдук аһаҕастык, күн аайы көстөр хартыына да буолбатар, олохпутугар син биир баар. Маны тохтоторго үгүс өйдөтөр, быһаарар үлэ, тэрээһин наада.

Марат Николаев, «Урааҥхай» кулууп вице-президенэ:
— Биһиги кулууппут улуус­таһыы­ны утарар. Араас улуустартан омук оҕолоро кэлэн дьарыктаналлар. Ыччат биһиэхэ эт-сиин өттүнэн буолбакка, өй-санаа өттүнэн сайдар. Бэҕэһээ Сэргэлээххэ буолбут түбэлтэ хомотор. Өрөспүүбүлүкэбит биир улахан бэлиэ күнүгэр ыччаппыт бэйэ-бэйэтин кытта кыргыһа сылдьара соччото суох. Ол оннугар биһиэхэ кэлэн дьарыктаналлара буоллар, рингэҕэ тахсан бэйэлэрин көрдөрүөх этилэр. Итинник уулуссаҕа мээнэ сылдьыахтара суох этэ. Онон уулуссаҕа буолбакка, рингэҕэ тахсан көрдөрүҥ. Бары бииргэ буолуохха, биһиги кулууппут түмсүүнү уонна бэйэ-бэйэни убаастаһыыны өрө тутар.

Лена Тарасова, Сунтаар улууһун ыччатын “Түмэн” түмсүүтүн бэрэссэдээтэлэ:
— Мин бэрэссэдээтэлинэн ананан үһүс сылбын үлэлии сылдьабын. Биһиги түмсүүбүт, сүрүннээн, сүүрбэ актыбыыс эдэр дьонтон турар. Ыччакка анаан үгүс тэрээһини ыытабыт. Холобур, устудьуон буолбут маҥнайгы куурус оҕолорун эҕэрдэлиибит, улууспут ыччатын түмэн көрсүһүү тэрийэбит. Атын улуустары кытары кыттыһан бырааһынньыктарга, бэлиэ күннэргэ түбэһиннэрэ эмиэ тэрээһин ыытабыт. Билиҥҥи ыччат олус көхтөөх дии саныыбын. Кыбыстан, толлон турбакка бары тэрээһиҥҥэ кэлэн кыттыыны ылар.

Василий Самсонов, Бүлүү улууһун «Ситим» ыччат түмсүүтүн бэрэссэдээтэлэ:
— «Ситим» диэн түмсүүгэ көхтөөх, үтүөҕэ тардыһар ыччат мустабыт. Мустуу – диэн уруккунан охсон өйдөөтөххө, хайдах эрэ соччото суохтук иһиллэр. Билиҥҥи ыччат 90-с сыллар эдэр дьонуттан чыҥха атын. Охсуһа, атааннаһа, улуустаһа сатаабат. Бэйэ-бэйэни өйөһүөххэ наада. Ол туһугар мустабыт. Холобур, үөрэххэ кэлбит саҥа «бырааттарбытыгар-балтыларбытыгар» куорат сиргэ олохсуйалларыгар көмөлөһөбүт. Эдэр дьону хонтуруоллуур, биллэн турар, уустук. Улуустаһыы куһаҕан эрээри, урут-уруккуттан баар дьыала. Сэргэлээххэ охсуһуу эмиэ аан бастакы охсуһуу буолбатах. Буруйдаахтары сокуон накаастыа, ону үлүннэрэ-үлүннэрэ улуустарынан арааран интернеккэ күөртүүр наадата суох.

Надежда САМСОНОВА.