Бүлүүгэ Гавриил Чиряев аатын үйэтитэллэр

Гавриил Иосифович Чиряев төрөөбүтэ 100 сылыгар кини аатын сүгэр 1 №-дээх Бүлүү орто оскуолатыгар Саха сирин үтүөлээх судаарыстыбаннай уонна бэлитиичэскаэй диэйэтэл аатын үйэтитиигэ тэрээһиннэр ыытыллаллар.

Г.И. Чиряев олоҕун уонна үлэтин сырдатар оскуола түмэлин саалатыгар экскурсиялар, кылаас чаастар, куонкурустар, кэмипириэнсийэлэр уонна сэминээрдэр ыыталлар. Экспозицияҕа кини кэргэнэ Зинаида Андреевна тус бибилэтиэкэтиттэн бэлэхтээбит суруктарын, кинигэлэрин билиһиннэрэллэр.
1994 сыллаахха үөрэххэ туйгуннарын, успуорка уонна уопсастыбаннай үлэҕэ үрдүк ситиһиилэрин иһин Чиряев аатынан истипиэндьийэ олохтоммута. Билигин истипиэндьийэни оскуола 41 выпускнига ылар чиэскэ тиксибитэ. Үбүлүөйдээх сылга «Истипиэндьийэ Бочуотунай кинигэтин» оҥороллор.
Сылын ахсын ыытыллар бэһис кылаас оҕолоругар «Юный Чиряевец» уонна «Я – будущий лидер» улуустааҕы дьыалабыай оонньуу быйыл уһулуччулаах киһи 100 сылыгар ананыа.

Тэрээһиннэр ортолоругар Бүлүү улууһун үөрэх тэрилтэлэригэр бастакы оскуола күннэрэ, «100 үтүө дьыала» оскуола аахсыйата, «100 уоланнар» флешмоб, «Түмэлгэ 100 киһи сырыыта» аахсыйа, көһө сылдьар быыстапкалар, видеоматырыйааллары, буклеттары оҥоруу, о.д.а. буолаллар.

Санаттахха, 1983 сыллаахха Бүлүү орто оскуолатыгар РСФСР Миниистирдэрин Сэбиэтин уурааҕынан Г.И. Чиряев аата иҥэриллибитэ.
Гавриил Иосифович Чиряев — Сэбиэскэй бартыыйынай уонна судаарыстыбаннай диэйэтэлэ, Аҕа дойду Улуу сэриитин кыттыылааҕа, ССКП Саха обкуомун бастакы сэкирэтээрэ (1965-1982).