1-кы Хомустаах нэһилиэгин «Улыбка» оҕо уһуйааныгар «Утум» түмэл аһылынна

Бу күннэргэ Нам улууһун 1-кы Хомустааҕын  уhуйааныгар түмэл  аһылынна.

Ыҥырыылаах ыалдьыттарынан  1-кы Хомустаах нэhилиэгин аҕа баhылыга Жирков В.Г., Нам улууһун  норуот үөрэҕириитин түмэлин  салайааччыта Шарапова Е.И., нэhилиэкпит уhуйааннарыгар өр сылларга үлэлээбит бэтэрээннэр, тэрилтэлэр салайааччылара буоллулар.
Түмэл аһыллыытын  эдэр педагог Обутова А.П. иилээн-саҕалаан ыытта. Нэһилиэккэ оҕо саада арыллыытын, историятын сэбиэдиссэй Баишева Н.М. кэпсээтэ. Нэһилиэк  дьаһалтатын исписэлииһэ Оконешникова В.А. бэтэрээн үлэһиттэргэ  «Нам» сопхуос 65 сылынан  Бочуотунай грамоталары, махтал суруктары туттарда.

Түмэли арыйыы аалай кыһыл лиэнтэтин уһуйаан сэбиэдиссэйэ Баишева Н.М. улуустааҕы  норуот үөрэҕириитин түмэлин  салайааччыта Шарапова Е.И.,  нэһилиэк дьаһалтатын исписэлииһэ Оконешникова А.А. уонна өр кэмҥэ уһуйаан  сэбиэдиссэйинэн үлэлээбит бэтэрээн  педагог  Колесова Н.С. быстылар. Бэтэрээн үлэһиттэр Колесова Н.С. уонна Сысолятина М.П. ыалдьыттарга уһуйааммыт баай ис хоһоонноох түмэлин сиһилии кэпсээтилэр, экспонаттары билиһиннэрдилэр.

Бу күн сарсыардаттан маастар-кылаастар буоллулар. Төрөппүт Сидорова К.В.  сиэлтэн сиэдэрэй оҥоһукка  уонна Барашкова А.К. кыбытык тигиигэ бэйэлэрин сатабылларыгар уһуйдулар. Бэтэрээн педагогтар коллекцияларын быыстапката сэҥээриини ылла.

Үөрүүлээх чаас кэнниттэн минньигэс астаах остуол тардылынна. Ыалдьыттарбыт баҕа санааларын үллэһиннилэр, инникитин өссө үрдүктэн үрдүк ситиһиилээх үлэни баҕардылар. «Эйгэ» саҥа көлүөнэ үлэһиттэрэ «Нам» сопхуос  баазатыгар үлэлээбит оҕо саадын  историятыттан  викторина ыыттылар. Манна муҥутуур кыайыылаахтарынан Березкина Т.А., Софронова Е.Д., Гоголева М.П.  буоллулар.
Инникитин  “Утум” түмэл сайдан, кэҥээн истин, эдэр көлүөнэҕэ уһуйаан историятын тиэрдэ турдун!

Ньургуяна  Баишева