1 мөл.солк. тахса сыаналаах дьиэни кумааҕы харчынан атыылаһыы бобуллуох курдук

Арассыыйаҕа сотору кэминэн 1 мөл.солк. тахса сыаналаах дьиэни кумааҕы харчынан атыылаһыы бобуллуох курдук.

Сокуон барыла бэлэм буолла, ол эрээри Госдуумаҕа киириэн иннинэ «Биир ньыгыл Арассыыйа» фракция эспиэрдиир сэбиэтэ сыаналыаҕа уонна бырабыыталыстыбаҕа эппиэти биэриэҕэ. Бу туһунан РБК-ҕа Госдуума тутууга уонна ОДьКХ-ҕа кэмитиэтин бэрэссэдээтэлин солбуйааччы Светлана Разворотнева иһитиннэрдэ.

Сокуон барылын быһаарыытыгар ааптардар Арассыыйа олохтоохторун икки ардыгар дьиэ-уот атыылаһыытын 10-15%-на кумааҕы харчынан оҥоһулларын бэлиэтииллэр. Ол түмүгэр киһини дьиэтэ суох хаалларар түөкүннээһин элбээбит. Өскөтө 2022 сылга 6 тыһ. түбэлтэ бэлиэтэммит эбит буоллаҕына, 2023 сылга хайыы-үйэ 8 тыһ. буолбут. Дьоҥҥо оҥоһуллубут хоромньу 32 млрд солкуобайтан 42 млрд солк. диэри улааппыт.

Разворотнева «үчүгэй түбэлтэҕэ» сокуон барылын Госдуумаҕа сааскы сиэссийэ бүтүүтүгэр (бэс-от ыйдарга) киллэриэхтэрэ, сыл бүтүөр диэри ылыныахтара диир.