10 сылтан ордук кэргэннии олорбуттарга сир учаастагын босхо биэриини туруорсаллар

Госдуумаҕа ЛДПР фракциятын дьокутааттарын бөлөҕө, баартыйа бэрэссэдээтэлэ Леонид Слуцкай салайааччылаах, 10 сылтан ордук ыал буолан олорбут уонна биир эбэтэр онтон элбэх оҕолоох дьиэ кэргэттэргэ дьиэ тутуутугар сир учаастактарын босхо биэрэргэ этии киллэрдэ.

Сөптөөх сокуон барыла бырабыыталыстыбатын көрүүтүгэр ыытылынна, диэн ЛДПР пресс-сулууспата иһитиннэрдэ. Бу туһунан «Парламентская газета» суруйар.

Көҕүлээһининэн, сир учаастага сөптөөх эрэгийиэн кыраныыссатын иһигэр турар, киирии-тахсыы суолунан хааччыллыбыт уонна инженернэй-тэхиниичэскэй хааччыйыы ситимнэригэр холбонор кыахтаах буолуохтаах. Ону таһынан, ити курдук учаастак, оҕолору киллэрэн туран, дьиэ кэргэн бары чилиэннэригэр уопсай үллэһиктээх бас билиитэ буолуоҕа.

Сокуон барылынан, эрэгийиэн былаастара дьиэ тутуутугар ирдэнэр инфраструктуралаах сир учаастактарын тыырар кыахтара суох буоллаҕына, ыйыллыбыт дьиэ кэргэттэргэ кинилэр сөбүлэҥнэринэн учаастак оннугар атын өйөбүл миэрэлэрин биэрэр бырааптаахтар.