10 тыһыынча киһи кыаммат дьону көрөрүгэр төлөбүрү ылар
![](https://sakha-sire.ru/wp-content/uploads/2023/04/3164f02222428c27895b1d4819ac5a2ce440cbcf.jpg)
Саха сиригэр 10 701 киһи кыаммат дьону көрөн олорон, социальнай көмөнү ылар. Ол иһигэр: 80 саастарын ааспыт, көрүүгэ-истиигэ наадыйар дьону, 1 группалаах инбэлииттэри көрөн олорооччу – 5835 киһи, инбэлиит оҕолору уонна оҕо эрдэхтэриттэн 1 группалаах инбэлиит дьону көрөн олорооччу – 4866 киһи.
Социальнай пуонда Саха сиринээҕи салаата кинилэргэ ыйдааҕы төлөбүрү төлүүр. Бу төлөбүр үлэлиир саастаах эрээри, үлэлээбэт уонна Дьарыктаах буолуу кииниттэн босуобуйа ылбат дьоҥҥо бэриллэр.
Бу төлөбүрү ыларга “Госуслуги” порталга тус кэбиниэккэ, эбэтэр Социальнай пуонда салаатыгар баран, икки сайабылыанньа бэриллэр. Ол курдук, төлөбүрү ылааччы «О назначении ежемесячной компенсационной выплаты неработающему трудоспособному лицу, осуществляющему уход за нетрудоспособным гражданином» диэн сайабылыанньаны, оттон көрүүгэ-истигэ наадыйар киһи «О согласии на осуществление неработающим трудоспособным лицом ухода за нетрудоспособным гражданином» сайабылыанньаны суруйар.
Сайабылыанньаны таһынан эбии докумуоннары туттарыы ирдэммэт, тоҕо диэтэр, Социальнай пуонда бэйэтэ тустаах тэрилтэлэртэн көрдөөн булар. Төлөбүр көрүүгэ-истиигэ наадыйар киһи биэнсийэтигэр эбилик курдук бэриллэр.
Сиһилии информацияны 8-800-600-02-98 төлөпүөҥҥэ эрийэн, билсиэххитин сөп.
Ил Дархан уонна Бырабыыталыстыба дьаһалтатын пресс-сулууспата.
Сообщить об опечатке
Текст, который будет отправлен нашим редакторам: