100 караттаах сэдэх бирилийээни кырыылаатылар

Арассыыйаҕа 100 караттаах, араҕас өҥнөөх ураты бирилийээни кырыылаатылар. Бу дойду аныгы устуоруйатыгар саамай улахан, сэдэх өҥнөөх бирилийээн буолар. 

Аан дойду үрдүнэн араҕас өҥнөөх бирилийээннэр ордук сыаналаналлар. Бу алмаас өҥө Vivid Yellow диэн ааттаах. Оттон саҥа кырыыламмыт бирилийээни «Саҥа Күн» диэн ааттаатылар.

200 караттаах алмааһы уһук хоту, «АЛРОСА» хампаанньа Эбэлээх учаастагар булбуттара. Бу алмаас 1 миллиард сыллааҕыта Сир түгэҕэр олус үрдүк баттааһын уонна сөҕүмэр итии сабыдыаллаабыттарын түмүгэр үөскээбит.

«АЛРОСА» кырыылыыр комплексын маастардарыгар бу маннык сэдэх алмааска хайдах быһыыны биэрэбит, хайдах кырыылыыбыт диэн уустук сорук турбута. Биллэрин курдук, алмаас бэйэтэ күлүмүрдээбэт. Киниэхэ улахан кээмэйин кыччаппакка эрэ, сөптөөх быһыыны биэрии уустук. Сөпкө кырыылаатахха эрэ, күн курдук күлүмүрдүүр, өҥүн арыйар. Ол эрээри, маастардар сатабыллара үрдүк буолан, бу үлэни кыайа туттулар.

«Саҥа Күнү» кырыылыырга 15 бастыҥ маастар 2 сылы быһа кыладыйан, чочуйан, үлэлээтилэр. Бастаан көмпүүтэргэ 3D-көрүҥүн оҥорон, спектральнай анаалыс ыытан, быһыытын быһаарбыттара. Ол аата хайдах кырыылаатахха, күн сардаҥата хас кырыыга иэҕиллэн, кустук өҥүнэн  дьэрэлийэн, ордук күүскэ күлүмүрдүү оонньуой диэн эрдэттэн аахпыттар-суоттаабыттар.

Арассыыйаҕа күндү таастары кырыылыырга аан дойду үрдүнэн билиниини ылбыт Russian Cut оскуола баар. «Саҥа Күн» бирилийээн ол оскуола сайдыытын өссө биир үктэлин быһыытынан билиниллэн, Арассыыйа аан дойдутааҕы алмаас-бирилийээн салаатыгар инники күөҥҥэ сылдьарын туоһулаата.