100 саастаах ытык кырдьаҕаһы Саҥа дьылынан эҕэрдэлээтилэр

Өрөспүүбүлүкэ 100 сылын туолар сылыгар  Аҕа дойду уоттаах сэриитин кыттыылааҕа, Сунтаар улууһун олохтооҕо  Прокопий Афанасьевич Степанов бу сайын 100 сааһын бэлиэтээбитэ.

Бу күннэргэ ытык кырдьаҕаһы кэлэн иһэр Саҥа дьылынан улуус мунньаҕын бэрэссэдээтэлэ Ульяна Попова, «Биир ньыгыл Арассыыйа» баартыйа Сунтаардааҕы салаатын сэкирэтээрэ   Борис Уларов уонна да атыттар эҕэрдэлээтилэр.  Прокопий Афанасьевичка кытаанах доруобуйаны, уһун дьоллоох олоҕу баҕардылар.

Ытык кырдьаҕас Сунтаар улууһун Сиэйэтигэр олорор. Прокопий Степанов  баара-суоҕа 19 саастааҕар  сэриигэ   бэбиэскэни туттан,  Волховскай фронт Сибиирдээҕи 386-с стрелковай полкатыгар тиийэн сэриилэспитэ. 1942 сыл атырдьах ыйыгар бастакы бааһырыытын ылан, хас да ыйы быһа  госпитальга эмтэммитэ.  Ол кэннэ  8-с гвардейскай батальон састаабыгар, салгыы 1-кы Белорусскай фронт 283-с стрелковай полка 8-с гвардейскай батальонун састаабыгар киирсэн сэриилэспитэ. Кыайыы күнүн Прокопий Афанасьевич Берлиҥҥэ көрсүбүтэ.