100 тыһыынчалаах Степановтар

Соторутааҕыта киин куоракка Урбаан пуорумун чэрчитинэн «Улахан дьиэ кэргэн дьоҕус биисинэһэ» өрөспүүбүлүкэтээҕи бырайыак куонкуруһа буолан ааспыта. 

Суолталаах тэрээһиҥҥэ  элбэх оҕолоох 20-тэн тахса  ыал кыттыыны ылбыта. Куонкуруска кыттааччылары кытта нэдиэлэ устата уопуттаах преподавателлэр, «Мин биисинэһим» киин бииси­нэс-тириэньэрдэрэ үлэлэспиттэрэ, сүбэ-ама биэрэн, бииси­нэс эйгэтин бырайыагар киирбит сайаапкалары көрөн ырыппыттара. Кыттааччылар ур­­баан араас көрүҥнэригэр үлэлииллэр. Ол курдук, атыыга-эргиэҥҥэ, сынньалаҥ баазатын тэриниигэ уо.д.а. хайысхаларга сайаапкаларын биэрбиттэр.

Дьүүллүүр сүбэ үс оҕолоох Дьокуускай куорат олохтоохторо Мария уонна Александр Степановтар спортивнай ос­­куоланы аһан үлэлэтэн эрэллэрин биһирээн, 100 тыһыынча солкуобай бирииһи  туттарбыта.

Бүгүн “Саха сирэ” хаһыат “Саха ыала” сыһыарыытыгар ыалдьыттыыр элбэх оҕолоох дьиэ кэргэн туллар тутааҕа, дьоллоох ыал ийэтэ Мария Степанова.

Москваттан саҕыллыбыт бырайыак

– Мария Валентиновна, чөл олоҕу тутуһууга туһуламмыт оскуоланы эһиги былырыын аспыт эбиккит. Бу туох хайысхалаах үлэни тэрийдигит?

– Биһиги манна, Дьокуус­кайга, көрсөн ыал буолбуппут. Үс оҕолоохпут: улахан уолбут сааһа – 15, кыыс – 12-тэ, кыра уол 3 саастаах. Кэргэним Александр бульдозерист идэлээх. Мин кэриэй уонна английскай тыл учууталабын. Биһиги дьиэ кэргэн чөл олохтоох дьоммут. Онон оҕолорбутун успуорка кыра эрдэхтэриттэн уһуйабыт. Кыыспытыгар дьарык буоллун диэн Москваҕа Арассыыйатааҕы Спортивнай скакалка чөмпүйэнээтигэр бара сылдьыбыппыт. Онно кыысчааным отучча оҕоттон бэһис миэстэҕэ тахсыбыта. Күрэхтэһии кэмигэр пилоннай спорт дьикти көрүҥэ эмиэ баарын таба көрөн, биһирээн, маннык хайысханы биһиги куораппытыгар арыйарга соруммуппут. Ол иһин Арассыыйатааҕы пилоннай успуорт федерациятын бэрэсидьиэнэ Полина Волчегы кытта анаан билсэн, бастакы саҕалааһыммытын сүбэлэттэрэн, былырыын балаҕан ыйыгар спортивнай-хореографическай оскуола арыммыппыт. “Пилоннай спорт” диэн акробатика, хореография, гимнас­тика уонна актер маастарыстыбатын үрдүк мачтаҕа тахсан көрдөрүү буолар. Бэйэбит анал тириэ­ньэрдээхпит. Биһиги дьиэ арыандалаан оҕолору эрчийэбит. Былааммытыгар – быра­йыак чэрчитинэн оҕолорун кэтэһэ олорор ийэлэргэ анаан эрчиллиилэри оҥорто­руохпут. Александр 7 саастарыттан үөһэ оҕолору дьарыктыаҕа.

Бастакы холонуу – чаҕылхай!

– Урбаан пуорумун чэрчитинэн ыытыллыбыт «Улахан дьиэ кэргэн дьоҕус биисинэһэ» куонкуруһу хантан билэн кыттыбыккытый?

– Тэрээһин туһунан биллэриини “Мин биисинэһим» тэрилтэ телеграм-ханаалыгар көрбүппүт. Сүбэлэһээт, син өр толкуйдаан баран, кыттарга санаммыппыт. 23 талыллыбыт дьиэ кэргэттэртэн 17 бырайыак көмүскэннэ. Ол иһигэр туризм, оҕону сайыннарар хайысха, атыы-эргиэн, оҥорон таһаарыы көрүҥнэрэ бааллара. Бары бырайыакпытын көмүскүүрбүтүгэр бэйэ-бэйэбитин истэн, уопут атастаһыытыгар үгүһү билбиппит-көрбүппүт.  Холобура, мин хор­туосканы фри оҥоруу уонна ону хоту улуустарга тиийэ тарҕатыы туһунан бырайыагы, элбэх оҕолоох ийэ быһыытынан, сэргии истибитим.

Бу маннык улахан тэрээһиҥҥэ биһиги бастакы холонуубут. Онон үлэбит биир сылын түмүктүүргэ бэйэбитигэр дьоһуннаах бэлэҕи оҥоһуннубут. Биири дьэҥкэтик өйдөөтүбүт – киһи санаатын, бириэмэтин ууран туран, тугу баҕарар кыайар, ситиһэр кыахтаах эбит. Онон эдэр ыаллары туохтан да толлубакка, бары санааҕыт сытар уопсастыбаннай дьыалатыгар кыттан иһиҥ диэн сүбэлиибит. Оттон биһиги кыайыыбытынан кынаттанан, дьыалабыт сайдарын туһугар өссө да үлэлэһиэхпит, араас тээһиннэргэ, куонкурстарга кыттан иһиэхпит диэн санааҕа кэллибит.

Ити курдук, былырыын бэйэлэрин дьыалаларын тэриммит Степановтар биир сыл иһигэр тахсыылаахтык үлэлээн, куонкуруска кыттан, быйылгы пуорум дьоруой­дарынан буоллулар.