Хаартыска: РИА
Үгүс дьону долгутар тыын боппуруостарынан бу күннэргэ Ил Түмэн Тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов уонна норуот дьокутаата Нюргуяна Заморщикова Госдумаҕа Уһук Илин уонна Арктика сайдыытын кэмитиэтин «төгүрүк остуолугар» кытыннылар. Кэмитиэт чилиэттэрэ, дьокутааттар Уһук Илин федеральнай уокурукка агробырамыысыланнай комплексы сайыннарыыга ылыныллар дьаһаллары дьүүллэстилэр.
Дьүүллэһиигэ таба, сылгы иитиитин, өртөөһүн боппуруостара таарылыннар. Ол курдук, Ил Түмэн туһааннаах кэмитиэтэ үс сытыы боппуруоска этиилэрин ыыттылар:
— Хотугу таба иитиигэр сыһыаннах федеральнай сокуоҥҥа саҥа редакциятын оҥорон бэлэмнииргэ;
— таба мэччирэҥ сирдэрин табаһыттарга сыһыарар боппуруостарын сүрүннүүр федеральнай таһымҥа нуормалыыр-быраап аахталарын ылынарга;
— Уһук Хоту сир оройуоннарыгар сэтиэнэх оту уматар, өртөөһүнү көҥүллүүр сыалга дойду Бырабыыталыстыбатын уурааҕынан бигэргэммит баһаары утары эрэһиимин быраабылатыгар уларытыылары киллэрэргэ.
Ону таһынан, сис кэмитиэт чилиэттэрэ РФ Тыа хаһаайыстыбатын министиэристибэтигэр сылгыны иитиигэ, ууһатыыга, батарыыга уонна туһаныыга бигэргэммит бэтэринээринэй быраабыла бирикээһигэр көннөрүүлэри киллэрэргэ этии киллэрдилэр. Чуолаан, бигэргэммит бирикээскэ сылгыны үөрдээн иитиигэ быраабыла балаһыанньалара тарҕамматын туһугар туруорустулар.
Санаттахха, былырыын тохсунньу 26 күнүгэр РФ Тыа хаһаайыстыбатын министиэристибэтэ сылгыны иитиигэ, ууһатыыга, батарыыга уонна туһаныыга бэтэринээринэй быраабылалары бигэргэтэргэ 939№-дээх «Об утверждении Ветеринарных правил содержания лошадей в целях их воспроизводства, выращивания, реализации и использования» бирикээһи ылыммыта. Быраабыла ирдэбилэ бу күһүҥҥэттэн, балаҕан ыйын 1 күнүттэн, олоххо киириэхтээх, оттон сорох пууннара 2025 сыл кулун тутар 1 күнүгэр уонна 2030 сыл балаҕан ыйын 1 күнүгэр диэри үлэлиэхтээх. Номнуо быраап информациятын интэриниэт-порталыгар бирикээс олунньу 7 күнүгэр таҕыспыта.
Быраабыла сылгыны ууһатар, иитэр, батарар уонна туһанар биирдиилээн дьоҥҥо, ону кытта бас билиититтэн тутулуга суох бары тэрилтэлэргэ сыһыаннаах. Докумуоҥҥа суруллубут ирдэбиллэр сорох кэккэ балаһыанньаларынан тохтоотоххо, бастакытынан, сылгыны иитэр хаһаайыстыба сыспай сиэллээҕи булгуччу маркировкалыахтаах уонна учуокка туруоттарыахтаах. Иккиһинэн, сылгы хаһаайыстыбатын территорията адьырҕа кыылтан көмүскүүргэ анал күрүөлээх-хаһаалаах эбэтэр хаххалаах буолуохтаах, ити таһынан учаастакка киирэргэ дезинфекцияны аһардар хааччахтар оҥоһуллаллара ирдэнэр. Хаһаайыстыба баазатын дьиэтин муннугуттан таһынааҕы ыаллыы сытар учаастакка диэри сылгы сааһыттан уонна төбөтүн ахсааныттан көрөн, муҥутуур тэйиччи турар кээмэйдэрэ киирэллэр. Холобур, баазаҕа 18 ыйыттан үөһэ саастаах 3 сылгы турар буоллаҕына, таһынааҕы учаастак 3 миэтэрэ тэйиччи сытара учуоттаныахтаах. Оттон 100 төбөлөөх хаһаайыстыбаҕа таһынааҕы учаастак 150 миэтэрэ тэйиччи буолара көрүллэр. Үсүһүнэн, үөр сылгы алта ыйтан ордук мэччирэҥ сиргэ көрүллэр буоллаҕына, учаастакка ардахтан, хаартан, тыалтан хаххалыыр эбии сылгыны туруорар тутуу баар буолара ирдэнэр. Маны таһынан көтөрү кытта сылгыны бииргэ иитэр көҥүллэммэт.
Сэтинньи 22 күнүгэр Дьокуускай куоракка биир дойдулаахпыт, киэн туттар киһибит, Саха Өрөспүүбүлүкэтин өрөгөйүн ырыатын хос…
Сэтинньи 23 күнүгэр Усуйаанатааҕы ЕДДС Уйаандьы сэлиэнньэтин баһылыгын солбуйааччытыттан икки киһи сүппүтүн туһунан суһал иһитиннэрии…
Аммалар күндү күтүөттэрэ, Бөтүҥ нэһилиэгин олохтооҕо, тимир ууһа Георгий Олесов-Дьулус Уус сөбүлүүр дьарыга киниэхэ аҕатын…
Сэтинньи 19-23 күннэригэр Москваҕа П.И.Чайковскай аатынан консерваторияҕа эдэр пианистарга норуоттар икки ардыларынааҕы II куонкурус үрдүк…
Соторутааҕыта «Айар Кут сойуус» уонна Нам улууһун «Отуу уота» суруйааччыларын, хоһоонньуттарын түмсүүлэрин чилиэнэ, үлэ бэтэрээнэ…
Былыр-былыргыттан сахалар оҕо төрөөн киһи-хара буолуор диэри оҕолорун олохторун ырыҥалыыллара. Саастарын ситтилэр даҕаны ыал оҥортуурга…