Марина Бахилина өрөспүүбүлүкэтээҕи социальнай хааччыйыы комплекснай киинигэр сырытта

Саха сиригэр дойду Бэрэсидьиэнэ Владимир Путин итэҕэллээҕэ Марина Бахилина өрөспүүбүлүкэтээҕи социальнай хааччыйыы комплекснай киинигэр сырытта.

Кырдьаҕастар уонна инбэлииттэр дьиэлэригэр тыыл уонна үлэ бэтэрээннэригэр, ону тэҥэ доруобуйаларынан хааччахтаах дьоҥҥо табыгастаах усулуобуйа тэриллибит. Соторутааҕыта манна тохсунньу 29 күнүгэр Саха сиригэр дойду Бэрэсидьиэнэ Владимир Путин итэҕэллээҕэ сырытта.

Социальнай киин дириэктэрэ Наталья Пахомова кырдьаҕастар уонна инбэлииттэр олорор тупсаҕай усулуобуйалаах дьиэтэ Саха сиригэр соҕотох буоларын бэлиэтээтэ. Кини итини тэҥэ чөл олоҕу уонна доруобуйаны чэбдигирдиигэ «Школа третьего возраста» тэриллибитин туһунан билиһиннэрдэ. Куруһуоктарга аҕа көлүөнэ бэрэстэбиитэллэрэ сахалыы сиэри-туому тутуһан харысхаллары оҥороллор, ону тэҥэ анал байыаннай дьайыы кыттыылаахтарыгар  өйөбүл тыллардаах сурук суруйаллар.

Саха сирин  тирэх пуунун волонтера Марина Бахилин кэмитиэт Саха сирин салаатын үлэтин, байыаннай дьайыы кыттыылаахтарын дьиэ кэргэттэригэр араас өрүттээх көмө оҥоһулларын туһунан кэпсээтэ.

«Кыһамньыгыт уонна өйөбүлгүт иһин махтанабын. Байыаннай дьайыы кыттыылаахтара эһиги бэлэмнээбит харысхалларгытынан киэн тутталлар», — диэтэ Марина Бахилина.

Көрсүһүү кыттыылаахтара Марина Бахилинаҕа байыаннай дьайыы кыттыылаахтахтарыгар бэйэлэрэ уонна «Специальный дом для граждан пожилого возраста и инвалидов» отделение ыытар үлэлэрин туһунан кэпсээтилэр. Кинилэр маскировка сеткаларын эрэ буолбакка, биһиги байыастарбыт улахан ирдэбиллэринэн туһанар блиндаж чүмэчитин эмиэ оҥороллор. Михаил Гаврильевич этэринэн, кинилэр 2023 сыл атырдьах ыйыттан үлэлииллэр. Билигин бу дьыаланан 10-ча киһи дьарыктанар.

«Былырыын 500 устуука блиндаж чүмэчитин уонна 140 маскировочнай сеткалары туттарбыппыт, быйыл өссө элбэҕи оҥорор былааннаахпыт, — диэтэ Михаил.

Киин быыбардыыр хамыыһыйа Владимир Путин 346 итэҕэллээх дьонун испииһэгин бигэргэппитэ. Онно култуура, ускуустуба, успуорт, биисинэс, мэдиссиинэ эйгэтин аатырбыт, биллэр-көстөр бэрэстэбиитэллэрэ киирбиттэрэ. Олор истэригэр актер Сергей Безруков уонна Владимир Машков, режиссер Никита Михалков, дирижер Юрий Башмет, тренер Ирина Винер уо. д. а. бааллар. Ону таһынан итэҕэллээх дьон статуһу Арассыыйа бары эрэгийиэннэрин ытыктанар бэрэстэбиитэллэрэ ылбыттара.

Арассыыйа бэрэсидьиэнин быыбара 2024 сыл кулун тутар 15 күнүттэн 17 күнүгэр диэри ыытыллыаҕа. Киин быыбардыыр хамыыһыйа түөрт хандьыдааты  — судаарыстыба баһылыга Владимир Путины, ону тэҥэ Николай Харитоновы (КПРФ), Леонид Слуцкайы (ЛДПР) уонна Владислав Даванкову (“Новые люди”) регистрациялаабыта.