Саха тыйаатырыгар Ил Түмэн тэриллибитэ 30 сыллаах үбүлүөйүн бэлиэтээтилэр

Бэҕэһээ, кулун тутар 1 күнүгэр Саха тыйаатырыгар Ил Түмэн тэриллибитэ 30 сыллаах үбүлүөйүн бэлиэтээтилэр. 

Үөрүүлээх тэрээһин  Ил Түмэн 30 сылыгар аналлаах видео көрдөрүүтүттэн саҕаланна. Өрөспүүбүлүкэ салалтатын аадырыһыгар Федерация Сэбиэтин бэрэссэдээтэлиттэн Валентина Матвиенко эҕэрдэ телеграмматын аахтылар, ону тэҥэ бырааһынньыктааҕы күҥҥэ Саха сирин сенатордара уонна норуот дьокутааттара эҕэрдэлээтилэр.

СӨ Ил Дархана Айсен Николаев үөрүүлээх мунньах кыттыылаахтарын Ил Түмэн 30 сыллаах үбүлүөйүнэн эҕэрдэлээтэ. «Ил Түмэн бастакы ыҥырыытыттан өрөспүүбүлүкэ уопсастыбаннай-бэлитиичэскэй олоҕун туруктаах оҥорорго күүстээх үлэ ыытыынна. 30 сыл иһигэр парламент бары ыҥырыыларыгар биһиги Сахабыт сирин олоҕун- дьаһаҕын бары өттүн хабар сокуоннар ылылыннылар. Бу күн Саха сирин бүттүүнүн барыбытыгар бэлиэ түгэн буолар. Үс уон сыл анараа өттүгэр икки балааталаах  парламены тэрийии Российскай Федерация састаабыгар Саха  сирин судаарыстыбаннаһын бөҕөргөтүү сүрүн түһүмэҕинэн буолбута. Өрөспүүбүлүкэ Үрдүкү Сэбиэтин быһаарыытынан уонна Саха сирин Бэрэсидьиэнэ М.Е. Николаев уурааҕынан, дириҥ устуоруйалаах, силистээх-мутуктаах норуот бэрэстэбиитэлистибэтин утумнаах уонна үгэстэрин оннунан хаалларбыта олус наадалаах», — диэтэ Айсен Николаев.

«Саха сирин парламена, норуот бэрэстэбиитэлистибэтин уорганын быһыытынан Саха сирин бэлитичэскэй куйаар кииннэриттэн биирдэстэрэ буолар. Саха сирин Ил Түмэнигэр 3 тыһыынчаттан тахса сокуон уонна 10 тыһыынча уураах ылылынна, 161 парламент уонна аһаҕас истиилэрэ, 333 бырабыыталыстыба чааһа уонна 388 төгүрүк остуоллар ыытылыннылар», — диэн  эттэ Ил Түмэн спикерэ Алексей Еремеев.

Тэрээһиҥҥэ 6 ыҥырыылаах Ил Түмэн  эдэр дьокутаата, анал байыаннай дьайыы кыттыылааҕа Мичил Николаев «Хорсунун иһин» мэтээлинэн наҕараадаланна. Ону кытта үөрүүлээх мунньах кэмигэр федеральнай уонна өрөспүүбүлүкэтээҕи судаарыстыбаннай наҕараадалар туттарылыннылар.