12 №-дээх оскуола биир симиэнэлээх үөрэтиигэ көһүө
14.01.2023, 18:00
Бөлөххө киир:
Бүгүн, тохсунньу 14 күнүгэр, Дьокуускай куорат Пригороднай сэлиэнньэтин 12 №-дээх оскуолатыгар 326 миэстэлээх эбии тутуу үлэҕэ киирдэ.
Саҥа эбийиэк «Үөрэхтээһин» национальнай бырайыак чэрчитинэн тутулунна. Үс мэндиэмэннээх, 5,2 тыһыынча кв.м иэннээх дьоһун тутуу үлэҕэ киирэн, оҕолор биир симиэнэнэн үөрэнэр кыахтаннылар. Эбийиэги үлэҕэ киллэрэр үөрүүлээх тэрээһиҥҥэ Ил Дархан Айсен Николаев кыттан, тутааччыларга махтал тылларын эттэ. Санатар буоллахха, тутуу үлэтэ былырыын ахсынньыттан саҕаламмыта.
Ил Дархан РФ Бэрэсидьиэнэ Владимир Путин көҕүлээһининэн үлэлиир «Үөрэхтээһин» национальнай бырайыак көмөтүнэн Саха сирин дьоҕус сэлиэнньэлэриттэн саҕалаан өрөспүүбүлүкэ киин куоратыгар тиийэ үөрэх элбэх эбийиэктэрэ тутуллаллар диэн тоһоҕолоон бэлиэтээтэ.
«Дьокуускай куоракка кэлэр сылларга оскуолаларга үөрэнээччилэр таһынан барыыларын төрдүттэн быһаарар сорук турбута. 10 сыллааҕыта манна 200 кэриҥэ оҕо үөрэнэр буоллаҕына, быйылгы үөрэх дьылыгар 700-тэн тахсыбыт. Бу — биһиги инники түһэн үлэлээн иһиэхтээхпитин көрдөрөр. 2023 сылга үөрэх эйгэтигэр ураты историческай түгэнинэн буолуоҕа. Ол курдук, быйыл Дьокуускайга 6 саҥа оскуола үлэҕэ киирэн, үөрэнээччилэр таһынан барыыларын төрдүттэн быһаарыахпыт, ол аата оҕолорбут бары өттүнэн сөптөөх усулуобуйаҕа үөрэниэхтэрэ», — диэн Айсен Сергеевич иһитиннэрдэ.
Саҥа оскуола үөрэтэр, мэдиссиинискэй кэбиниэттэринэн, бибилэтиэкэнэн, остолобуойунан, спортивнай, аактыбай саалларынан уонна анал аныгы оборудованиеларынан толору хааччыллыбыт. Оскуола тэлгэһэтигэр спортивнай саҥа былаһаакка уонна тренажернай анал сир-уот баар.
Оскуола дириэктэрэ Михаил Уйгуров иһитиннэрбитинэн, оскуола 120 миэстэлээх буоллаҕына, бүгүҥҥү күҥҥэ 700 кэриҥэ оҕо үөрэнэр эбит. Билигин үрдүкү кылаас оҕолоро саҥа эбийиэккэ үөрэниэхтэрэ. Алын кылаастар эрдэ тутуллубут дьиэҕэ хаалыахтара.
+1
+1
+1
+1
+1
+1
+1
Сообщить об опечатке
Текст, который будет отправлен нашим редакторам: