12 саастаах оҕолоох үлэһити ууратыахтарын сөп дуо?

— Биһиги тэрилтэбит улууска филиаллаах. Филиал сабыллар түгэнигэр туохха олоҕуран үлэһити ууратыахтаахпытый? 12 саастаах оҕолоох үлэһити ууратыахпытын сөп дуо? – диэн ыйыталлар.

Тустаах ыйытыыга СӨ Идэлээх сойуустарын үлэ быраабыгар иниспиэксийэтин салайааччыта, СӨ үтүөлээх юриһа Наталья Барковская хоруйдуур:

— РФ Үлэ кодексын 81 ыст. 4 ч. олоҕуран, атын сиргэ баар филиал, бэрэстэбиитэлистибэ эбэтэр тэрилтэ атын туспа турар салаатын үлэһиттэрин кытта үлэ дуогабарын көтүрүү Үлэ кодексын 81 ыст. 1 ч. 1 п. тустаах салааны (подразделение) суох оҥоруу быраабылатынан сирдэтиллэр. Маныаха үлэҕэ  хаалларыы ураты бырааба учуоттаммат (Үлэ кодексын 179 ыст.), үлэҕэ ылыы бэрээдэгинэн атын үлэни көрүүр эбээһинэһэ суох (Үлэ кодексын 81 уонна 180 ыст.), уо.д.а.

Үлэ кодексын 318 ыст. олоҕуран, тэрилтэ суох буолуутунан сибээстээн (Үлэ кодексын 1 ыст. 1 ч.) эбэтэр тэрилтэ үлэһитин ахсаанын эбэтэр ыстааты сарбыйыытыгар (Үлэ кодексын 81 ыст. 1 ч. 2 п. ) уһук хоту улууска уонна онно тэҥнэһэр сиргэ баар тэрилтэттэн үлэһити ууратарга, ыйдааҕы орто хамнаһа кээмэйдээх ууратыы босуобуйата төлөнөр. Өскөтүн бу киһи биир эбэтэр икки ыйтан ордук үлэлээбит түгэнигэр, үлэ биэрээччи үлэттэн ууратыы күнүттэн икки уонна үс ыйдааҕы орто хамнаһын төлүүр. Ураты түгэннэргэ нэһилиэнньэ дьарыктаах буолуутун сулууспатын уорганын быһаарыытынан, үлэһит үлэтиттэн уурайан баран 14 күн иһигэр тустаах уоргаҥҥа тиийбит уонна уурайыаҕыттан үс, түөрт уонна биэс ый устата үлэ булбатах түгэнигэр, үлэ биэрээччи салгыы төрдүс, бэһис уонна алтыс ыйдарын орто хамнаһын төлүүр эбээһинэстээх.

Үлэ кодексын 261 ыст. олоҕуран, үс сааһыгар диэри оҕолоох, соҕотох ийэни, 18 диэри саастаах инбэлиит оҕолоох эбэтэр 16 диэри саастаах ийэтэ суох оҕолору атын иитэр киһини, 18 диэри саастаах инбэлиит оҕолоох соҕотоҕун иитэр төрөппүтү (сокуоннай бэрэстэбиитэли) эбэтэр дьиэ кэргэнин соҕотун иитэр үс сааһыгар диэри оҕолоох, 14-гэр диэри саастаах үстэн элбэх оҕолоох, атын төрөппүтэ (сокуоннай бэрэстэбиитэл) үлэлээбэт түгэнигэр (Үлэ кодексын 81 ыст. 1 ч. 1, 5-8, 10, 11 п. эбэтэр 336 ыст. 2 п. ураты) ууратар көҥүллэммэт.

Үлэ кодексын ыстатыйатыттан көстөрүнэн, сокуон Үлэ кодексын 81 ыст. 1 ч. 1 п. тэрилтэ суох буолуутунан эбэтэр урбаанньыт үлэтин тохтоторунан сибээстээн, 12 саастаах оҕолоох дьахтары үлэтиттэн ууратары хааччахтаабат.