120-тэн тахса киһи быстах хомууртан төннөн эрэр

Ил Дархан сорудаҕынан өрөспүүбүлүкэттэн мобилизацияҕа барбыт дьон ирдэбилгэ сөп түбэһэрин бэрэбиэркэлиир үлэ салҕанар. Айсен Николаев телеграмм каналыгар суруйбутунан барыта 120-тэн тахса киһи быстах хомууртан төннөн эрэр. Билиҥҥи туругунан, Хабаровскай кыраайтан хамыыһыйаны ааспатах  56 киһи, Приморскай кыраайтан 8 киһи дойдуларыгар төнүннүлэр.

Бу туһунан кини сулууспалыыр буойуннар ийэлэрин уонна кэргэттэрин кытта көрсүһүүгэ эппит. Көрсүһүүгэ сулууспалааччылар уонна кинилэр дьиэ кэргэттэри өйүүр туһунан араас этиилэр киирбиттэр. Айсен Сергеевич суруйарынан, хас биирдии этиини болҕомтоҕо ылыахтара.

Манна даҕатан эттэххэ, икки хонуктааҕыта Ил Дархан Айсен Сергеевич мунньахха Арассыыйа Бэрэсидьиэнин ыйааҕар суруллубут нуормалар кичэйэн толоруллуохтарын ирдээбитэ. Маны таһынан Ил Дархан Өрөспүүбүлүкэ Бырабыыталыстыбатыгар хомуурга хапсыбыт байыннайдар дьиэ кэргэттэригэр социальнай өйөбүл оҥоруу кээмэйин бигэргэтэллэригэр сорудах биэрбитэ.