127 тыһ. солкуобайдаах табаары интэриниэт-маҕаһыынтан уорбуттар
Өрөспүүбүлүкэҕэ күннэтэ кэриэтэ уоруу араас түбэлтэтэ тахса турар. Бу күннэргэ Ис дьыала министиэристибэтин управлениетын 2 нүөмэрдээх полиция отделыгар интэриниэт-маҕаһыын бэрэстэбиитэлиттэн 127 800 солкуобайдаах табаары уорбуттарын туһунан сайабылыанньа киирбит.
Суһал-ирдиир үлэ кэмигэр холуобунай ирдэбил үлэһиттэрэ уорбаланааччыны быһаарбыттар. Ол курдук интэриниэт-маҕаһыын табаары биэрэр пуунун урукку үлэһитэ, 22 саастаах дьахтар эбит.
Уорбаланааччы сыл аҥаарын устата бэйэтин аатыгар араас табаары сакаастаан баран, харчытын төлөөбөт эбит. Сакаастаабыт таҥаһын барытын бэйэтигэр ылбыт. Харчы итээбитин инвентаризация кэмигэр быһаарбыттар. Ол эрээри дьахтар номнуо туһааннаах пуунтан уурайан барбыт.
Билигин эдэр дьахтарга РФ Холуобунай Кодексын 160 ыст. 1 чааһынан холуобунай дьыала көбүтүллүбүт.
Сообщить об опечатке
Текст, который будет отправлен нашим редакторам: