Нам улууһугар көмө оҥоруу салҕанар

Ыам ыйын 28 күнүгэр СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников уонна Ил Түмэн спикерэ Алексей Еремеев салайааччылаах оробуочай бөлөҕө Нам улууһугар үлэлээтэ.

Бырабыыталыстыба чилиэттэрэ, министиэристибэлэр, биэдэмистибэлэр салайааччылара кыттыылаах дэлэгээссийэни Нам улууһун баһылыга Юрий Слепцов арыаллаата. Бастакы уочарат өрөспүүбүлүкэ салалтата 100% халаан уутугар барбыт Граф Биэрэгэ нэһилиэги көрүүттэн саҕалаата диэн Нам  улууһун пресс-сулууспата иһитиннэрэр.

Хас да сыл нэһилиэги ууттан көмүскээн турбут даамбаны быйылгы халаан уута хас да сиринэн тоҕута көппүтэ. Олохтоохтор даамбаҕа өрөмүөн үлэтин хаамыытын  туһунан кэпсээтилэр. Салгыы оробуочай бөлөх чилиэттэрэ оҕо уһуйааныгар, тиэхиньикум  уонна фельдшерскай-акушерскай пуун эбийиэктэрин көрдүлэр-иһиттилэр. Бу эбийиэктэр эмиэ улахан өрөмүөнү эрэйэллэр.

Хаһан да ууга барбатах Маймаҕа нэһилиэгэ быйыл 100% ууга былдьаммыта. Оскуола-оҕо уһуйаана уонна фельдшерскай пуун дьиэлэрэ ууга баран, улахан хоромньу көрүстүлэр. Бу дьиэлэргэ оҕо сылдьар, дьон үлэлиир кыахтара суох буолла. Онон, бу боппуруоһу төрдүттэн быһаарарга үгүс кэпсэтиилэр бардылар.

Салгыы Хатырыкка 1980-с сыллар саҕаланыыларыгар тутуллубут икки боксалаах аҕыйах ахсааннаах баһаарынай чаас дьиэтин көрдүлэр. Баһаарынай чаас Хатырык, Маймаҕа уонна Түбэ нэһилиэктэрин хааччыйар. Оттон суол аһылыннаҕына, эбии өрүс нөҥүө сытар Көбөкөн уонна Арбын нэһилиэктэрин хааччыйыаҕа. Билигин баһаарынай чаас дьиэтэ хаарбах туруктааҕынан ааҕыллар. Итинэн сибээстээн олохтоохтор саҥа  баһаарынай чаас дьиэтин тутуутун туруорустулар.

Бу иннинэ, ыам ыйын 28 күнүн сарсыардатыгар, СӨ Баһаар сулууспатын салайааччыта Руслан Босиков улуус баһылыга Юрий Слепцову кытта баһаарынай чаас дьиэтин көрөн, салгыы туох үлэ барыахтааҕын дьүүллэспиттэрэ.

Итиэннэ дэлэгээссийэ Хатырык нэһилиэгэр 96 ынах сүөһүтүн халааҥҥа сүтэрбит Александра Слепцова салайааччылаах бааһынай хаһаайыстыбаҕа сырыттылар. Саха сирин тыатын хаһаайыстыбатын дьоно-сэргэтэ улахан хааһйыстыба салайааччытыгар утары баран, ыам ыйын 27 күнүгэр Ньурба улууһуттан 5, оттон Кэбээйи улууһуттан ыам ыйын 28 күнүгэр 27 ньирэйи көмө быһыытынан туттарбыттара биллэр.

Салгыы оробуочай бөлөх састааба Модут уонна Бөтүҥ нэһилиэктэрин санитарнай туруктарын көрдүлэр. Олохтоох дьаһалталар баһылыктара салайааччыларга туох баарынан сиһилии быһаардылар, кыһалҕаларын кэпсээтилэр.

Бу сырыы кэнниттэн олохтоохтор чөлүгэр түһэрии уонна өрөмүөн үлэлэрэ хаачыстыбалаахтык ыытыллалларыгар, олох уйгута тупсарыгар, салгыы сайдарыгар эрэнэллэрин биллэрдилэр.