«Защитники Отечества» судаарыстыбаннай пуондаҕа 2600-тэн тахса сайабылыанньа киирдэ

Саха сиринээҕи «Защитники Отечества» судаарыстыбаннай пуонда филиала байыаннай дьайыылар бэтэрээннэригэр  уонна өлбүт байыаннай сулууспалаахтар дьиэ кэргэттэригэр өйөбүл уонна көмө оҥорууга үлэтин салгыыр.

«Быйыл ыам ыйын 31 күнүнээҕи туругунан пуонда филиалыгар 2600-тэн тахса киһиттэн сайабалыанньа киирдэ. Кинилэртэн  барыта 10500-тэн тахса ыйытык киирбитэ, олортон бүгүн 90%-на быһаарылынна», — диэн бүгүн, бэс ыйын 4 күнүгэр, Саха сиринээҕи «Защитники Отечества» судаарыстыбаннай пуонда филиалын салайааччыта Алексей Александров иһитиннэрдэ.

Социальнай координатордарынан 2 тыһ. кэриҥэ бойобуой дьайыы бэтээрээннэрин уонна өлбүт дьиэ кэргэттэрин чилиэннэрин кэлимник доҕуһуоллааһын үлэтэ ыытыллар. Кинилэргэ 500-кэ сырыы оҥоһулунна. Пуонда филиалыгар психологическай көмө 640 киһиэхэ, ол иһигэр 117 бойобуой дьайыы бэтэрээннэрэ туһаннылар.

СӨ Адбакааттар балаататын дьокутааттарынан босхо юридическай көмө оҥоһуллар,  СӨ Борокуруора, Саха гарнизонун байыаннай Борокуруора уонна СӨ Киһи быраабыгар боломуочунайа консультациялары ыытталлар. Мэдииссинэ боппуруостарыгар 900-тэн тахса, ол иһигэр байыаннай дьайыылар бэтэрээннэриттэн 200-тэн тахса этии киирдэ. Муус устар 6 күнүттэн мэдиссиинэ тэрилтэлэринэн доруобуйа харыстабылын бастакы звеноларыгар диспансеризацияны уонна сэрэтэр мэдиссиинэ көрүүлэрин 207 байыаннай дьайыы бэтэрээнэ ааста, кинилэртэн клиническэй психолог консультацияларыгар – 127, эбии анал испиэлиистэргэ – 166 киһи сырытта

Ыам ыйын 30 күнүгэр «Дохсун» успуорт уораҕайыгар Саха сиригэр аан бастакытын «Аҕа дойду көмүскэлин Кубога» адаптивнай успуорт көрүҥнэригэр  анал байыаннай дьайыы кыттыылаахтарыгар комплекснай физкултуурунай тэрээһин буолла. Турнир тэрийээччилэринэн пуонда филиала, Саха сирин физическэй култуураҕа уонна успуорка министиэристибэтэ, өрөспүүбүлүкэтээҕи физическэй култуура уонна успуорт киинэ, ДОСААФ Саха тиэхиниичэскэй оскуолата, «За Отечество» Саха сиринээҕи байыаннай дьайыы кыттыылаахтарын Ассоциацията кытыннылар. Бэтэрээннэр буулдьанан ытыыга, армрестлиҥҥэ, ох саанан ытыыга, пауэрлифтиҥҥэ уонна остуол тенниһэ курдук успуорт көрүҥнэригэр күрэхтэстилэр.

Күрэхтэһии түмүгүнэн Саха сирин түмсүүлээх хамаандата тэрилиннэ. Хамаанда быйылгы бэс ыйын 19-20 күннэригэр ыытыллыахтаах Уһук Илин бэтэрээннэрин ортолоругар норуоттар икки ардыларынааҕы физкултуурунай тэрээһиҥҥэ кыттыахтара.