13 мөл. солк. суумалаах кыһыл көмүһү илдьэн испит тэрилтэ дириэктэрин туттулар

Мэҥэ Хаҥалас оройуонун полицията уопсайа 13 мөл. солк. суумалаах кыһыл көмүһү тиэйэн испит тэрилтэ дириэктэрин туттулар.  

Госавтоиниспиэксийэ үлэһиттэрэ Аллараа Бэстээххэ Ленин уул.  суоппар докумуоннарын бэрэбиэркэлээри Hyundai Solaris  массыынаны тохтоппуттар. Массыына суоппара кыһыл көмүһү хостуур предприятие 50 саастаах дириэктэрэ эбит.

Массыына кэлиҥҥи олбоҕор суумкаҕа  салапаан бакыакка сууламмыт биэс слиток, араҕастыҥы-кугас өҥнөөх металл биэс куһуога,  кыһыл көмүс бытархайдара, 900 тыһ. солк.кэриҥэ харчы, электроннай ыйааһын баар эбит. Бу маны барытын   Госавтоиниспиэксийэ үлэһиттэрэ уонна экэнэмиичэскэй куттал  суох буолуутун бөлөҕүн оперативниктара булан  көрбүттэр.

Ол кэннэ металлары эспэртиисэҕэ ыыппыттар.

Химическэй чинчийии түмүгэр биллибитэ, уопсайа 1,6 кг ыйааһыннаах кыһыл көмүс эбит.

Суоппар полицейскайдарга Өймөкөөнтөн Дьокуускайга диэри 500 тыһ. солк. манньа иһин  күндү металлары илдьэн иһэрин туһунан кэпсээбит.

Билигин эр киһиэхэ  РФ Холуобунай кодексын 191 ыст. 4 чааһынан холуобунай дьыала көбүтүлүннэ диэн  @mvd_sakha иһитиннэрдэ.