13 мөлүйүөн ыал Ийэ хапытаалын туһаммыт

2007 сыллаахха Ийэ хапытаала олохтонуоҕуттан, 16 сыл устата дойду үрдүнэн барыта 13 мөлүйүөн дьиэ кэргэн сэртипикээти ылла. 

Үбүлүөйдээх  13 мөлүйүөн  ахсаанынан Саратовскай уобаласка олорор дьиэ кэргэн ылла. Кинилэргэ олунньу ыйга иккис оҕолоро төрөөбүт. Быйылгы үрдээбит кээмэйинэн 775,6 тыһыынча солкуобайы ылбыттар.

Социальнай пуонда ЗАГС дааннайдарынан туһанан, сэртипикээти сайабылыанньата суох, электроннай көрүҥүнэн тута оҥорон биэрбит. Ийэлэрэ «Госуслуги» порталга баар тус кэбиниэтигэр хапытаал сэртипикээтэ киирбит. Онон пуондаҕа бара да сылдьыбатахтар.

Санатар буоллахха, 2007 сыллаахха Ийэ хапытаалын суумата 250 тыһыынча солкуобай этэ. Билигин суумата үс төгүл улаатта. Маны тэҥэ, 2020 сылтан бастакы оҕоҕо эмиэ бэриллэр буолла. Биир оҕолоох ыалга бэриллэр хапытаал суумата 586,9 тыһыынча солкуобайга тэҥнэһэр.

Бу 13 мөлүйүөн дьиэ кэргэнтэн 10,6 мөлүйүөн ыал уопсайа 3,7 триллион солкуобай суумалаах хапытаалларын туһаммыттар диэн Социальнай пуонда пресс-сулууспата иһитиннэрэр.