130 миллиартан тахса суумалаах үп социальнай өйөбүлгэ бэриллиэҕэ

Үп миниистирин эбээһинэһин толорооччу Иван Алексеев алтынньы 15 күнүгэр «2026 сылга уонна 2027-2028 сс. былааннаммыт кэмҥэ СӨ судаарыстыбаннай бүддьүөтүн туһунан” сокуон барылынан аһаҕас истиилэригэр бүддьүөт сүрүн кээмэйин иһитиннэрдэ.
Судаарыстыба бүддьүөтүгэр сүрүнүнэн судаарыстыба бары социальнай эбэһээтэлистибэлэрин саарбаҕа суох уонна кэмигэр толоруу буолар.
2026 сылга социальнай-култуура эйгэтин (доруобуйа харыстабыла, үөрэхтээһин, социальнай бэлиитикэ, физкультура уонна успуорт) ороскуотугар
130 миллиард 263,5 мөлүйүөн солкуобай көрүллэр.
“2026 сылга өрөспүүбүлүкэ судаарыстыбаннай бүддьүөтүн бырайыагын социальнай суолтата хаалар. Сорох көрдөбүллэр уларыйбыттарын да иһин, бырабыыталыстыба дьиэ кэргэни, оҕолору уонна аҕам саастаах дьону өйүүр сүрүн хайысхалары үбүлээһини улаатыннарар кыаҕы булла”, — диэн СӨ Үпкэ министиэристибэтигэр иһитиннэрдилэр.
Ол курдук, “Дьиэ кэргэни өйөөһүн” эрэгийиэннээҕи бырайыагы үбүлээһин 117,5 мөлүйүөн солкуобайынан улаатар. Ити үп ийэ өрөспүүбүлүкэтээҕи хапытаалын, саҥа ыал буолааччыларга биир кэмнээх төлөбүрү, бастакы оҕо төрөөһүнүгэр, оҕолорго ый аайы бэриллэр төлөбүрү үбүлээһини хааччыйарга ыытыллыаҕа.
2026 сылга судаарыстыба бүддьүөтүн дохуотун уопсай кээмэйэ — 309 миллиард 768,2 мөлүйүөн солкуобай, ороскуот кээмэйэ 317 миллиард 339,7 мөлүйүөн буолуоҕа.
СӨ Ил Дарханын уонна бырабыыталыстыбатын пресс-сулууспата
Сообщить об опечатке
Текст, который будет отправлен нашим редакторам: