Таатта аграрийдара саҥа тыраахтыр күлүүстэрин туттулар

Таатта улууһугар Ил Дархан Айсен Николаев оруобуочай сырыытын кэмигэр саҥа тыраахтыр күлүүстэрин туттарда. «МТЗ 12-21» уонна «Беларусь 82-1» саҥа тыраахтырдары Тааттатааҕы тыа хаһаайыстыбатын сэттэ  бааһынай хаһаайыстыбалара уонна кэпэрэтииптэрэ ыллылар.

Тиэхиньикэ «Развитие кормопроизводства» судаарыстыбаннай бырагыраама «Развитие сельского хозяйства и регулирование рынков сельскохозяйственной продукции, сырья и продовольствия» хос бырагырааматынан атыылаһылынна.

«Бырагыраама сүрүн сыала — олохтоох оҥорон таһаарыыны элбэтии, олохтоох бородууксуйаны Саха сирин олохтоохторугар тиэрдии буолар. Ол чэрчитинэн бырагырааманан көрүллэр үп-харчы, бастатан туран, тыа сиригэр үлэлиир уонна тыа хаһаайыстыбатын сайыннарар дьону-сэргэни өйүүргэ туһуланыахтаах», — диэтэ Айсен Николаев.

Таатта оройуонугар уопсайа 23 тиэхиньикэ атыылаһылынна, олортон 9 тыраахтар уонна 14 бырысыаптаах тиэхиньикэ. 7 трактор  номнуо улууска кэллэ, атын тиэхиньикэ сотору кэминэн аҕалыллара күүтүллэр. Быйыл Саха сирин улуустарынан бу бырагырааманан барыта 203 тиэхиньикэ атыылаһыллара былааннанар. Ааспыт сылга 20 муниципальнай тэриллиигэ 174 тиэхиньикэ барыта 265 мөл. солк. суумаҕа ылыллыбыта. Үп-харчы өрөспүүбүлүкэ бүддьүөтүттэн уонна олохтоох бүддьүөттэри кытта хос үбүлээһининэн көрүлүннэ. Чуолаан, Тааттаҕа 2023 сылга 15 тиэхиньикэ 20 мөл. солк. суумаҕа, ол иһигэр 6 тыраахтыр ылыллыбыта.

Таатта улууһа Саха сирин биир бастыҥ тыа хаһаайыстыбатын улууһунан биллэр. Тыа хаһаайыстыбатын бородууксуйатын баалабай оҥорон таһаарыытынан бэһис миэстэҕэ сылдьар. Манна Саха сирин 6% тыатын хаһаайыстыбатын бородууксуйата,  4% бааһыната, 6% оттуур ходуһата уонна 5% мэччирэҥ  сирдэрэ түмүллэр.

«Развитие кормопроизводства» хос бырагыраама 2017 сылтан олоххо киирэр. Ол чэрчитинэн муниципальнай тэриллиилэринэн сүөһү иитиитин сайыннарыы бырагыраамаларын олоххо киллэриигэ судаарыстыбаннай бүддьүөттэн субсидия бэриллэр.

Тиэхиньикэни, оборудованиены атыылаһыы таһынан, бырагырааманан көрүллэр үп-харчы күрүө тутуутугар, хоруулары хаһыыга, сенаһы харыстааһыҥҥа, дороххой аһылык култууратын сиэмэтин атыылаһыыга ананар. Былырыын хос бырагыраама үбүлээһинигэр уопсайа 356 мөл. солк. көрүллүбүтэ, ол иһигэр өрөспүүбүлүкэ бүддьүөтүттэн — 175 мөл. солк., олохтоох бүддьүөттэриттэн —  181 мөл. солк. Быйылгы сылга — 379 мөл. солк., өрөспүүбүлүкэ бүддьүөтүттэн — 175 мөл.,олохтоох бүддьүөттэртэн — 204 мөл. солк. көрүллүбүт.