14 оҕолоох Татьяна Юдинцеваҕа «Дьоруой ийэ» аат иҥэрилиннэ

РФ Бэрэсидьиэнэ  Владимир   Путин ыйааҕынан Саха сирин олохтооҕор Татьяна Владимировна Юдинцеваҕа «Дьоруой ийэ» үрдүк  аат иҥэрилиннэ. Бу туһунан үөрүүлээх сонуну Ил Дархан Айсен Николаев  иһитиннэрдэ.

—Татьяна Владимировна  кэргэнинээн Павел  Васильевичтыын 14 оҕолоохтор.  Улахан иллээх дьиэ кэргэн Нерюнгри оройуонун Иенгратыгар олороллор.  Юдинцевтар  бу иккис улахан наҕараадалара.  2018 сыллаахха РФ Бэрэсидьиэнин илиититтэн  «Төрөппүт Албан аата» уордьаны туппуттара.  Ис сүрэхпиттэн  Татьяна Владимировнаны уонна кини улахан дьиэ кэргэнин маннык улахан наҕарааданан эҕэрдэлиибин. Эһиги — Саха сирин киэн туттуута буолаҕыт!, — диэн Айсен Николаев телеграмҥа суруйда.

Татьяна уонна Павел Уссурийскайга билсиһэн, ыал буолан баран, Саха сиригэр 1997 сыллаахха кэлбиттэр, Иенграны сөбүлээн олохсуйбуттар. 2011 сыллаахха Юдинцевтар СӨ бырабыыталыстыбатын гранын ылан, икки мэндиэмэннээх дьиэ туттубуттара. 2012 сыллаахха кинилэргэ УАЗ массыына биэрбиттэрэ. Онтон 2016 сыллаахха Татьяна Владимировна 14 оҕону төрөппүт ийэ быһыытынан, СӨ бэрэсидьиэнин бириэмийэтинэн наҕараадаламмыта. Кини бэйэтэ эмиэ 11 оҕолоох ыал кыыһа. Оттон Павел 12 бииргэ төрөөбүттээх.