141 кыбартыыралаах арендалыыр дьиэҕэ киирии түмүктэрэ сотору биллиэҕэ

Саха сирин тутууга миниистирэ Виктор Романов  быйыл нэһилиэнньэ кэккэ араҥатыгар чэпчэтиилээх сыананан олорор дьиэни арендалыырга Дьокуускай куорат 111 кыбартаалыгар «BILIBINO» комплекс үлэҕэ киллэриллэрин туһунан  Ил Дархан уонна бырабыыталыстыба официальнай саайтыгар, “ВКонтакте” уонна “Одноклассники” социальнай ситимнэргэ быһа эпииригэр иһитиннэрдэ. 

Дьокуускайга Билибин аатынан уулусса 17 нүөмэригэр баар 141 кыбартыыралаах олорор дьиэ наадалаах миэбэлинэн, сантехниканан уонна олоххо-дьаһахха туттуллар тиэхиньикэнэн хааччыллыбыт. Миниистир эппитинэн, бу дьиэҕэ арендалаһан олорууга дьону ылыы хайыы үйэ түмүктэммит.

«Быйылгы сүүмэрдээһин түмүктэрэ сотору биллиэхтэрэ, испииһэктэр бигэргэтилиннилэр, ону  сотору иһитиннэриэхпит”, — диэн Виктор Романов  эһиил өссө  200-тэн тахса кыбартыыралаах арендалыыр дьиэ үлэҕэ киллэриллэрэ былааннанарын туһунан эбэн эттэ.

Саҥа дьиэҕэ аренда суумата ыйга  кыбартыыра иэниттэн тутулуктанан, 5-14 тыһынча солкуобай буолар. Олорооччулар хомуналынай өҥөнү туспа уонна толору кээмэйинэн төлүүллэр.

«Бу бырагыраамаҕа сүрүн болҕомто манна үлэлии кэлбит, бэйэлэрэ дьиэлэрэ суох исписэлиистэри олорор дьиэнэн хааччыйыыга ууруллар. Бастакы араҥаҕа – оборуона бырамыысыланнаһын үлэһиттэрэ, онтон салгыы араас салааҕа үлэлиир исписэлиистэр киирсэллэр. Салааларынан исписэлиистэри биһиги хамыыһыйабыт Дьокуускай куорат уокуругун этиилэринэн бигэргэттибит.  Ким олорор  дьиэтэ суох, чэпчэтиилээх сыананан икки сыл курдук олоруон сөп, дьиэ ыларга бастакы төлөбүрүн мунньунан баран, дьиэни бэйэтин бас билиитигэр атыылаһыан сөп.

Арендаланар дьиэ – каадырдары тардарга туһалаах. Холобур, үөрэҕин бүтэрбит устудьуон үлэҕэ киирэр, ол гынан баран,  кыбартыыра атыылаһар кыаҕа суох. Харчы мунньунан баран, эдэр исписэлиис быһыытынан үлэлии хаалыан уонна кыбартыыраны атыылаһыан сөп” – диэтэ Виктор Романов.

СӨ Ил Дарханын уонна бырабыыталыстыбатын пресс-сулууспата