Ааспыт сууккаҕа Саха сиригэр 8 ойуур баһаара умуруорулунна

Ааспыт сууккаҕа  Саха сиригэр 8 ойуур баһаара умуруорулунна. Бу туһунан от ыйын 24 күнүгэр брифиҥҥэ Саха сирин кылаабынай лесничэйэ Андрей Коноплев иһитиннэрдэ. 

«Ааспыт сууккаҕа Бүлүү уонна Сунтаар оройуоннарыгар 2 ойуур баһаара умуруорулунна. Ойуур баһаарынайдарын тэрилтэлэрин күүстэринэн уопсайа 15 124,5 га иэннээх сиргэ 6 ойуур баһаара тохтотулунна. Ленскэй, Мэҥэ Хаҥалас, Мииринэй уонна Өлүөхүмэ улуустарынан ойуур баһаардара турбуттара биллэр»,-диэн бэлиэтээтэ Андрей Коноплев.

От ыйын 24 күнүнээҕи туругунан  Саха сиригэр 88 ойуур баһаара баар, ону тэҥэ 1 ландшафтнай. Ойуур баһаара 18 муниципальнай тэриллии территорияларынан баар. Баһаары умуруорууга 1814 киһи үлэлиир уонна 141 тиэхиньикэ туһанылынна.

Бүгүн Абый уонна Үөһээ Бүлүү улуустарынан авиация үлэтэ ыытыллыаҕа. Ми- 8 бөртөлүөт Абый улууһун Белая Гора уонна Киэҥ Күөл нэһилиэктэригэр  чугаһаабыт баһаардары умуруорууга туһаныллара былааннанар. Икки Бе-200 амфибия-сөмөлүөтэ Үөһээ Бүлүү оройуонугар Өргүөт уонна  Үөдүгэй нэһилиэнньэлээх пууннарга чугаһаабыт ойуур баһаардарыгар умуруорууга үлэлииллэрэ былааннанар. Былыт баар буоллаҕына зондировщик-сөмөлүөттэр ойуур баһаардара турбут улуустарынан үлэлиэхтэрэ.

«Абый улууһугар эбии күүстэр ыытыллыбыттарын санатабын. Билигин 133 киһи ойуур баһаарын бохсууга үлэлиир. Бэҕэһээ Киэҥ Күөл нэһилиэнньэлээх пуунуттан утары уот ыытыыта үчүгэй түмүгү көрдөрдө. Нэһилиэнньэлээх пууннарга уот кииритэ бэлиэтэммэтэ. Бу сарсыардаттан Абый улууһугар ардах түстэ. Эмиэ бэҕэһээ Ан- 26 сөмөлүөтүнэн Үөһээ Бүлүү оройуонугар 18 киһилээх, ол иһигэр ЫБМ кылаабынай управлениетын аэромобильнай бөлөҕө, «Авиалесоохрана» 8 баһаарынай  парашютнай- десантнай сулууспатын үлэһитэ»,-диэн Андрей Коноплев иһитиннэрдэ.

Ааспыт сууккаҕа ойуур пуондатыгар авиациянан уонна космостан кэтээн көрүүнэн 11 ойуур баһаара турбута бэлиэтэннэ. Баһаартан сэрэхтээх буолуу сезонун саҕаланыаҕыттан уопсайа 655 ойуур баһаара умуруорулунна.