Хаартыска: ааптар түһэриитэ
От ыйын 17-21 күннэригэр Олимпийскай чөмпүйүөн, аан дойду үс төгүллээх кыайыылааҕа, ССРС успуордун үтүөлээх маастара Павел Павлович Пинигин аатыгар, “Саха сирин тимир суоллара” тэрилтэ бирииһигэр көҥүл тустууга уолаттарга бастаан Бүтүн Арассыыйатааҕы аһаҕас, онтон норуоттар икки ардыларынааҕы турнирдар ыытыллан түмүктэннилэр.
Биһиги Павел Павловичтан, күрэхтэһии уонна тэрээһин туһунан туох санаалаҕын туоһуластыбыт.
-Биһиги уолаттарбыт ааспыттааҕы күрэхтэһиитээҕэр чаҕылхайдык туһуннулар. Ким көхтөөхтүк тустар, ким көбүөргэ күүстээхтик үлэлиир, ким тустуу албастарын баһылаабыт – ол хаһан баҕарар кыайар. Тустуу ити үөрүйэҕэ оҕо саастан үөскүүр. Көбүөргэ бастакы хардыыттан. Оҕолор кэм-кэрдии быһыытынан сайдан иһэллэр. Ону быйылгы, биһиги эдэрдэрбит ситиһиилэрэ даҕаны көрдөрөр. Лев Павлов уонна Андрей Мидловец Арассыыйа түһүлгэтигэр бастаан баран, салгыы Европа күрэхтэһиитигэр кыайдылар. Ол аата, биһиэхэ инникигэ эрэл баар. Ити биһигини үөрдэр.
Финалларга Анатолий Иванов үчүгэй тустууну көрдөрөн, кыахтаахтык бастаата. Киниэхэ биһиги “Турнир бастыҥ бөҕөһө” анал бирииһи туттардыбыт, салгыы кыайыыларга алҕаатыбыт. Бу курдук, манна ситиһиилээхтик тустубут уолаттар салгыы эдэрдэргэ Роман Дмитриев, онтон улахаттарга Дмитрий Петрович Коркин турнирдарыгар бэйэлэрин ааттарын ааттаталларыгар баҕарабыт. Спортсмен сайдыыта барыта ситимнээх буолуохтаах. Тэрээһин үчүгэй. Успуорт министиэристибэтэ уонна «Дохсун» успуорт уораҕайын баазалаах Успуорка инники эрэллэри бэлэмниир өрөспүүбүлүкэтээҕи киин үлэһиттэрэ эппиэтинэстээхтик сыһыаннаһан үлэлээтилэр. Маннык күрэхтэһиилэри тэрийэн, бэлэмнээн ыытыыга кинилэр үөрүйэхтэннилэр да диэххэ сөп.
Бу күрэхтэһии генеральнай спонсора – «Саха сирин тимир суоллара» тэрилтэ. Генеральнай дириэктэр Шимохин Василий Владимирович бэйэтэ тустуук буоларын быһыытынан, успуорка эрэ буолбакка, Саха сирин сайдыытыгар араас эйгэҕэ барытыгар көмөлөһөр, сүрдээх көхтөөх, өйдөөх, дойдутун туһугар ыалдьар үрдүк таһымнаах салайааччы диэн сыаналыыбын. Инникитин бу күрэхтэһиини өссө киэҥ хабааннаахтык тэрийэн ыытыыга кэскиллээх санаалар бааллар. Ол олоххо киирэрин туһугар туруулаһан үлэлэһиэхпит.
Петр ПАВЛОВ. Ааптар хаартыскаҕа түһэриитэ.
Хаҥалас улууһун 1-кы Малдьаҕар нэһилиэгин олохтоохторо ааспыт өрөбүллэргэ бэлиэтэммит "Нэһилиэк күнүгэр" бэртээхэй сонуну истэн үөрдүлэр.…
Бу күннэргэ Амма улууһун баһылыга Степан Кузьмин кыстыкка киириигэ бэлэмнэнии чэрчитинэн улуус киинин хочуолунайдарын туруктарын…
Таатта Харбалааҕар Аҕа дойду Улуу сэриитигэр кыайыы 80 сыллаах үбүлүөйүн көрсө бэлэмнэнии үлэ саҕаланна. "Дьоһуннааҕы…
Бүгүн СӨ Урбааҥҥа, атыыга-эргиэҥҥэ уонна туризмҥа миниистирэ Тимур Ханды министиэристибэ үлэһиттэригэр «Туризмы сайыннарыы уонна территориальнай…
Балаҕан ыйын 14 күнүгэр "Мукучу нэһилиэгэ" МТ баһылыга Николай Иванович Левин, "Сарыал" түөлбэ салайааччыта Анна…
Нам улууһун баһылыга Юрий Слепцов анал дьаһалынан улуус социальнай-экэнэмиичэскэй сайдыытын пуондатын бырабылыанньата халаан уутуттан эмсэҕэлээбит…