14,8 тыһыынча ыал «100 сыл оҕолоро» хапытаалы ылла

Ил Дархан сорудаҕынан, бу хапытаалы оҥорторуу хаамыыта быдан судургутуйбута, үбү туһаныы көрүҥэ кэҥээбитэ. Тус хапытаалы ыларга сайабылыанньа да суруйар ирдэммэт. Төрөппүттэр Арассыыйа гражданнара буолуохтаахтар уонна Саха сиригэр бастайааннай олоруохтаахтар. Саҥа төрөөбүт оҕоҕо ЗАГС управлениетыттан сибидиэтэлистибэ ылыахтарын эрэ наада.

5253 ыал хапытаал үбүн олорор дьиэ усулуобуйатын тупсарыыга ыыппыт. 1263 ыал — тырааныспары, 153 — оҕо үөрэнэригэр, 42 — кирэдьиити сабарга, 35 — кэтэх хаһаайыстыбаны сайыннарарга, 32 —Арассыыйа устун дьиэ кэргэнинэн сынньанарга, 11 — дьиэҕэ гааһы киллэрэргэ туттубуттар.

Айсен Николаев  Анал этиитигэр «100 сыл оҕолоро» хапытаал өссө 5 сыл уһуурун уонна сыл аайы индексацияланарын туһунан эппитэ.

Онон, 2025 сылга «100 сыл оҕолоро» хапытаал суумата индексацияланан, 116 тыһыынча солкуобайга тэҥнэһиэҕэ.

Бу хапытаалы Ил Дархан Айсен Николаев 2022 сыллаахха — Саха Өрөспүүбүлүкэтэ олохтоммута 100 сылыгар киллэрбитэ. Бу хапытаалы дьиэ кэргэҥҥэ хаһыс буоларыттан тутулуга суох, саҥа төрөөбүт оҕолор бары ылаллар. Маннык хапытаал Саха сиригэр эрэ баар.